دخلنا بسوق المال نزوة بـلا تفكيـر = والاحلام بالثروة والامـوال تدفعنـا
سمعنا رجال عينوا من وراها خيـر = بعد فقرهم صاروا هواميـر وطمعنـا
وقلنا ورانا مانسـوي سـواة الغيـر = طريق وسع ذا الناس ملزوم ياسعنـا
نبي نشتري بالنت ونتابـع التغييـر = الى حولت نشري واذا نسبـت بعنـا
وخذينا الحصيل اللي جمعناه بالتوفير = وزدنا عليـه بسلفـة مـن جمايعنـا
ولا به علامـات تدلـك ولا تقديـر =الى قرقعت بعض الاشاعات قرقعنـا
امور غريبة مالقينـا لهـا تفسيـر =الى جيت احلل وصفها مالها معنـى
وبدينا نكلـم وانتسمـع لكـل مشيـر = وراي يقديـنـا وراي يضيـعـنـا
شرينا من الاسمنت والجبس والتعمير =وضمنا الغناة اللـي عليهـا تربعنـا
وجلسنا نتابع شاشة النت كل عصير = نبيها تزيد وقصرت عـن مطامعنـا
وطحنا بها طيحة غشيم بجمـة بيـر =الا يالله انـك بالسـلامـة تطلعـنـا

وصل قولك الوافي وأنا أزيد فالتقرير =كشتنا بسوق المال وزانت مرابعنا
وعنتر نسي عبله وقيس انتخى بالزير =بعد خضّرَت ليلى شربنا ورفّعنا
ودار الفلك مع دورة الترس أبو جنزير = ودرنا معه فيها وطرنا ووقعنا
بغينا نهومر واهمرونا هل التهمير = وقلنا نضارب يوم بانت تفقّعنا
أنا واحدٍ فالسوق جمّال صار بعير = مربّط صبر.. والصبر عيّا يطاوعنا
وذنبي على جنبي..لا عامر ولاهو عمير = ولا هو مدير السوق ماقال لي طعنا
شريت المواشي ياعرب والمواشي غير = مزايين هل المعزاء.. لارحنا ترجعنا
أضوّي بها وأسرح وأضرّم لها بشعير = أبى أسمّن المعزاء قبل لا تودعنا
شريت المواشي..أحسب إن المواشي اطّير = وهي سهم لا جعنا أبد ما يشبّعنا
ولكن على الله رزقنا.. يالله التيسير = طلبناك يالرزاق.. بالحيل تنفعنا
وعوّض علينا.. وارفع الحظ لين يصير = وزان القمر.. يارب سدد مرامعنا
وأصلي وأسلم وأرفع الصوت بالتذكير = بذكر الحبيب المصطفى.. واقلطوا معنا
على مهيّله يقعد بها الراس.. والتدبير = يزين.. وبعدها كل شاعر يسمّعنا