قصيدة الشاعر الكبير/ عجير بن بلاج بن سمير الحزيمي العتيبي
موجه إلى أبنه الشاعر/سعود بن عجير العتيبي
عندما سافر خارج الوطن في مهمة عمل لخدمة هذا الوطن الغالي

وقدر رد عليه أبنه الشاعر سعود بن عجير العتيبي
بهذه القصيدة

يامرحبا ترحيب يرقا لهامتك=ترحيب مشتاقٍ لفوله غيوبي
تحيةٍ عطرة لحضرة جنابتك=والمسك والعنبر عليها يذوبي
وعسى ولي العرش يقبل بدعوتك=ويجير روحك ياعطيب الضروبي
يابوي هلت عبرتي من رسالتك=وحضنتها في ما علا من جنوبي
إرسالةٍ مضمونها من قريحتك=نضمتها وأندبتها لي ندوبي
وحكمتها وأرزنتها من رزانتك=ونقدتها عن كل شئٍ يشوبي
وحضبتها وأرويتها من خصوبتك=ونجبت جزلات البيوت الذروبي
وأغلا الجواهر ما أحتوتبه قصيدتك=ألبستهـــا وأتحفتهــــا بالعـــذوبـي
وعن ناقدين القول ترقا بنقوتك=وأنا على بدع القوافي نجوبي
وهاجت بي أفكاري لتحقيق غايتك=وشهرت للي بالسنام أشهروبي
وشاشت بي بيوتٍ صفت من صفاوتك=وسبحت معها مع حتين الغروبي
وشرعت بيبان الضمير إلنصيحتك=وأسقيتها للقلب مثل الشروبي
ويابوي ودعت الضماير وداعتك=ولا أنسقت مع درب الهواء في نحوبي
في كل لحظاتي أراقب وصيتك=ما أنشبت نفسي في هواها نشوبي
وبإذن الكريم إني ما أخالف ربوتك=وأسعدك وأسعد من وفوا واسعدوبي
ويابوي عزي من معزة مكانتك=أسمك يشرفني ويرفع نسوبي
أفخر إليا جابوا مجالك وسيرتك=سيرة شرف وافخر بها مع صحوبي
حضيت من مهد الطفولة مودتك=وأنا لعسرات المراقي خطوبي
ومنك أحتضنت العز وأصغي لحكمتك=وأوفي ونزهين الشوارب وفوبي
وعهدٍ علي لأحفظ مكانة ريادتك=وأسكن مساكنها النحر والتروبي
وعلمت نفسي من معالي نزاهتك=وقوم الغيا مع دربهم ما غووبي
عشت بحياتي منهلي من مروتك=ما عشت فيها بالحيل والنهوبي
هابتني العدوان من هول هيبتك=وعادت بهم جمع الهزايم سروبي
شجاعتي ورثتها من شجاعتك=وحنا لصلفات الليالي طبوبي
وكسبت منك أرقى المكارم بعفتك=وبها كريمين الجناب أمدحوبي
أعلا صروح المجد وأحفظ وجاهتك=ولا همني أهل الحسد لو حكوبي
على عروش القلب ترسي معزتك=لو غربتي تشعل بقلبي شبوبي
رهنت روحي في مطالب زعامتك=أسهر ولو قوم الرخا ما دروبي
أساير أحوالي وأسير بسياستك=ولا أحدٍ على سيرتك يلقى شذوبي
واقف مواقيفٍ تشرف بوقفتك=وأفخر إليا من الرجال أنتخوبي
أسلى بقربك وأتشرف بخدمتك=وبعدك يكدر شرب مايه بكوبي
مع كاسبين الطيب سادة سيادتك=ووجبتهم في واجباتك وجوبي
الطيب والشيمة مكاسب تجارتك=وحصنتها عن ملحقين الشهوبي
من همتك ما يلحق الضيم جارتك=عطفك شمل ماهوب دوبك ودوبي
فيك اقتران العز يشمل رحابتك=خليت عدوانك تزايد عطوبي
جاوزت جيلك في مبادي صبوتك=ونزهت نفسك عن جميع الهزوبي
وميزات نزهين القيم ما تعدتك=عسفتها واستيسرت لك رغوبي
رمي الهدف ما أخطته دقة إصابتك=وأخذت صفوتها وعفت الصروبي
حزت المراجل في شبابك لشيبتك=وعزيت عن مجلس عيال الخروبي
وأنا على يمناك وأحذو بخطوتك=وأخفض جناحي لك بلينٍ وأدوبي
يرتاح بالي في سرورك وراحتك=وضيقك أعده كربةٍ من كروبي
وأنا على ما تطلبه رهن أشارتك=وأجلب حياتي دون روحك جلوبي
وأشقى بروحي لأجل أحقق مسرتك=لو راحت أضلوعي من أجلك حطوبي
وأنا مع أحرارٍ ربت تحت عزتك=أفخر بهم ياسيدي وافخروبي
علمتنا من مبتدأ العمر خوتك=وحنا بمرحلة الصبا والهذوبي
لو قلت عذبات الطواريق ما أوفتك=شخصك غني عن ما كتب فالكتوبي
هذا وصفحتها رديفة لصفحتك=عسى تنال أرضاك في كل نوبي
وأقبل تحياتٍ تعانق تحيتك=من شبلك اللي للمكارم طلوبي
ولا يادهر ماني خضوعٍ لميلتك=أقسى من الفولاذ يادهر طوبي
صارم بهوماتي وأقاسي صرامتك=من فضل ربي ما ألتفت للسبوبي
رغم أنها تعيي المناعير قسوتك=خضتك ولاني عن مرامي قصوبي
أعيش بأمجادي وأجنب متاهتك=وأغزي مع اللي فاللوازم غزوبي
ويالله تقبل لي سجودي لطاعتك=وعفوك ولطفك في نهار عصوبي
يافارجٍ لأيوب من سوء كربتك=أغفر خطاي وما كتب بمكتوبي

وفي الختام لا يسعني إلا أن اشكر القائمين على هذا الصرح العملاق لقبيلة الشجاعة والفروسية (الهيلا)
مع أملي أن تحوز هذه المشاركة على رضا من يقراها
ودمتم بخير وسلام
تحياتي للجميع
((((الحــــدب))))

شكراً على مرورك أخوي (سلطان الجذع)
هذا من طيب ذاتك
وعسى ربي يبشرك بالخير ودامت لك الأفراح

وانتظروا ما يليق بهذا المنتدى الذي يتشرف من ينتسب له

أخوك
{الحــــدب}