ابى اكتب من دمي الجوف شعرًا حبره الشريان=حقيقه غامضه عمدانها بالقلب منهاره
زهمت من المثايل كا محبوكن على القيفان=هجوسن تطرب بزين القصيد اسموع شعاره
ومديت وفرشت الها من الديباج والكتان=ويزهاها من السندس حرير بصنع بيطاره
وتيجان الملوك بقبضتي مع خاتم اسليمان=وسلمته هنوفن من مهاة الريم ذياره
هنوفن يوم جتني والسعد من كفها ودان=تربع فوق عرش القلب في ليله مع انهاره
هنوف الحي قامت تجدل من المي بالقدحان=وتسقي زرعها اللي كل ماله تذبل ازهاره
دعتني يمها وقالت كلامن يذهل الاذهان=كلامن معجزن يصفق يمين الفكر بيساره
غدى فكري بجو الهايمه و وهومها حيران=قريبن من منازل فالنيا وبعيد عن داره
نجومن ساطعه غابت عقب نورن علانا بان=على المشرق بدا والغرب قالو شافو انواره
وهبت له نسايم تدفي ياللي بايتن بردان=تقفتها عجاجن مااتركت طاير وطياره
وذراع ٍ مااسرقت قصت بعدل ومنتهى البرهان=ويمنًاسارقه في ذمة التوراه واحباره
سمعت الصوت من ضرب الحوافر قاسي التربان=ورى هاك السواد اللي حوى الكونين بأستاره
وقفت ابابها لين الخيول اتغير بالفرسان=كماة مدججينن للوغا ماهابو اغماره
وصاحت فالرجال اللي حورها يذبح الشجعان=بني عمي وستري بيتكم لاينفضح عاره
وشام العينها حرن تعزوى بعزوة الجدان=ثنى من دون ربعه صيرمين شد ميزاره
بسيفن يفصل الارقاب في حده عن الابدان=يصاوعهم على سرج وقدم ماقصرت اشباره
عثى فيهم وشافو شيخهم في رحمته منهان=وهجو ناكفينن مااربحو فودن من الغاره
بقى منهن عقب ماروحن مهره وابوها احصان =ومن غار القلايع فيهن الارماح عقاره
وهاذي جادلن تبكي على زوج وولد واخوان=تعشتهم ذيابن في لحوم الصيد جزاره
كريمن جاد من يمناه جودن يكرم العربان=قلط في مجلسه قومن لفو من ضمن خطاره
وقام الهم وقال الله يحيي ساعة الضيفان=وقام وقرب اللي زاهبه وتفوح ببهاره
وصب اللي كما صاف الذهب في كفة الميزان=من الدله بصينن يثني الفنجال لاداره
خذو فنجال ثم قالو تمام ولا بها نقصان=وحنا في سفر الوقت يغصبنا على اسفاره
نظر بالقوم والياهم غريبينن عن الاوطان=اجانيباً عن الديره ولاقط جو لها ازياره
لقى بوجيههم ماضن طوي في صفحة النسيان=لقى رسمن بعصر الجاهليه دونه اغباره
يشوف ابهم شقى الدنيا وضيم الجاريات الوان=عبادن في حضيض العيش وصلو لاخر اغواره
وقالو ياوسيع العرف حنا في وسط ميدان=ولاجينا عشان الزاد والا عندنا اتجاره
وقام اللي تزعمهم وشد لسرجها والارسان=وقال اسمع كلامن لايقص يديك منشاره
انا بأنبيك عن قومن لهم فالغابرين اكيان=غدو في بطن الام اللي تشيل الذنب واوزاره
وجانا من نباهم ماذكره الله بالقوران=عن اخبار القرون وجيلها اللي فنيت اعماره
وقلت اعرف قومن شالها جبريل بالجنحان=وساواها بحد الحزم واعرف من سكن غاره
وقال اتعرف موسى والغلام اللي من الغلمان=ونادى بالغدا واوقف بحيد الصخره ابحاره
نسى حوت البحر موسى وقال انساني الشيطان=وواجه يوم عود عبد فيه الحلم ووقاره
وقلت اعرف هاذي قصته تقرى بكل لسان=وذاك الخضر عبدن علمه ربي من اسراره
وقال اكيد جتك اخبار من ماتو من الطوفان=نبياً قد عصاه ابنه وعدى قمة القاره
وقومن جادلو والله ومرهم قصدهم عصيان=امرهم يذبحون من البقر ماحدد اماره
ومنهم من جحد بالمصطفى انه ناسخ الاديان=ولايامنك في دينار كيف يمد قنطاره
مشى موسى لميقاته وحدرهم من الاوثان=ووصى اخوه لايغويه كيد ابليس وانصاره
وقام السامري وجاب فتنه تفتن العميان=فتنهم في جسد عجلن توحى القوم لخواره
وقال إلاهكم والاه موسى ناسن الديان=وقع بالشرك والاشراك مايمحاه كفاره
وقلت القوم ذولا لاسبتو تجيهم الحيتان=وقومن في كتاب الله ملعونه وغداره
كتب ربي يتيهون اربعين ابعالم التيهان=بني اسراييل قالو نحن شعب الله مختاره
وزادت بي ظنون الشك وفوادي على النيران=وقمت اجاذب الاريا بدار الشك وامصاره
وفي خافي ضلوعي ونة اللي بالعمر حسران=بغدر لصاحبن وافي وجارن باق به جاره
وكلمت الغريب اللي يجر ثويبه الهمدان=وقال ان دار نجمن فاانشد البيدا عن اخباره
وقطعت البحر في مركب وهم هايم بلا قطان=ورسى بارضن ثمرها شوك تينن يبس اشجاره
وجاني من معه من صنع بابل صاحبن ماخان=مرصع بالجواهر مثل در بجوف محاره
وقال انت وش جابك بدارن زرعها الاحزان=ترى من طب شبرن غاص حتى سبع ابحاره
نشدته قلت له يامسلم انت انسان والا جان=وقال الامر واحدن مسلمن بالسر واجهاره
وقال اوصيك في سبع المثاني والكريم امعان=وكم كم اشفت اللي فيه اطبا العلم محتاره
وحق الوالدين يزود ضعف ليا غدو شيبان=وعقوق الوالدين تسبب ادهى الشر واشراره
وقال الكفر دون الشرك طغيانن على طغيان=ولافاد العجوز اللي تحنى اعلاج عطاره
وصد وقال قول الزور واللي يشهده هلكان=تراه من الكباير يحرق اللي طاح في ناره
وقال الله ترى يبغض ثلاثه منهم الفقران=لبس لبس الكبر واستاقته رجله بدحداره
وقال افطن من الاعور ومن سيلن من الوديان=تراها تقنص الرجال خص ابساعة اسفاره
وترى في تالي الهجره تشوف الدين ماله شان=حبل للمسلمين الكفر وارداهم بشنكاره
وقال الاصل في دم العروبه ثابت السيسان=ينام الرجل وامن ماخشى بعده عن ادياره
وقال الشمس نجمن والقمركوكب بلانيران=يدورن الكواكب حول جرم النجم وامساره
خلقنا بالثلاث المظلمات اطوار خلق انسان=ويكتب رزق واجل العبد يوم اتشكل اطواره
وهتلر لو يعود معه مليونن من الالمان=ماخلى من طيور الروس طيرًا داخل اوكاره
حدايق بابل السبع العجاب اسطورة الازمان=سكنها السومري قدام تنهد فوقه اسواره
بلاد الرافدين اللي هواها ينعش الوجدان=وكم شاعر تغنى في بلاد العرب بأشعاره
علاها ياولد صقر اربعن غير العشر ثمان=مداها لا انتصف تحسب مابين الثمن واعشاره
مثل مابات اهلها بت في هم وكدر واشجان=تخاشر قلبي المكسور في شره وفي خاره
يلايمني ببنتن خدها مثل القمر لابان=شعاع اخدودها بالليل كنه نور سياره
اجي لعيونها عاني لوني دايخن صلفان=والاعبها ليا نامو بتال الليل سماره
تماشيني على كيفي واماشي كيفها بأحيان=وكل منا لقى له صاحبن يفرح بمسياره
تذكرني بمسرانا وحنا من ورى رضوان=وقلت القلب بين يديك مكياله ومعياره
وحنا نطوي الخط السريع بوارد اليابان=كويت امبيرها لان انسدح ماهست الطاره
لمح للعين برقن في سما اوهام نشت بأمزان=وهلت غيث سيل مجمع النهرين وانهاره
وابى اسوق له زودن مثل سوق مهوّس اشعيطان=تسوقه زعب مع تسعين خيلن تهذب امهاره
وبكيته مثل مايبكي اليتامى ثمرة الفتيان=نخن ذياب بن غانم بجفنن تسبل اعباره
يتيمة حب في قلبن يتيمن ضمها بأحضان=نعاها بالدموع ومن كسورن مالها اجباره
هوىً ماهوهوى غرو غنوجن ناعم الذرعان=هوى اللي يمزج بكاس الغلا حاليه وامراره
على كتفي مشيت اشيلها في خايع الخليان=ابى احللك واعيوني لدمع الحزن نثاره
حفرت ابسبّع الارض وكفنت وداعتي باكفان=لحد مسنك انا حافره بيديني وقباره
وانا قلبي على لاماك من وجد الهوى شفقان=يعالج حزنه اللي ما كفت من دونه اعذاره
بحزنن مثل شالح يوم يبكي ذيب ابن هدلان =رحى موت البنادم مع رحى الايام دواره
ومثل دمعن على وضحى يهله نمر ابن عدوان=وسجل بالرثا في صفحة التاريخ واسطاره
مثل غبن الزناتي يوم طاع امورد الاوجان=تقول اله الصفيرى فك قيد العبد واهجاره
عقب طاح ابفراش الموت غاشيه احمر الدمان=لعن كيد النسا واللي يشاورهن فأشواره
ومثل وقع الخبر في قلب ابو ليلى وهو سكران=وعى من سكرته والقلب شب الجمر بأوجاره
يقول ان السما طاحت وهدت شامخ البنيان=وعلى بابه رسول الموت جاين يقطف اثماره
تقول اله اليمامه وين ابويه مكعم العدوان=ب(كار)اميه من الفرسان يعزل باللقا كاره
ياعماه اليمامه عانها تبكي مع اليتمان=مدامعها تحالي مدلهمن هلت امطاره
يبات الزير ليله عند قبرن من حصى والبان=يقول اللي بقى لي من كليب القبر واحجاره
بكى حتى انفجر صدره بغيظن كنه البركان=وسرج خيله وسل السيوف وصاح بالغاره
وحلف له دين يوم انه تعلى سرج ابو حجلان=ليذبح من بني مره كبار القوم واصغاره
وقام ابحرب لاشيفت ولاسمعت بها الاذان=اخذ عشرين عام ومثلها يوفي بها ثاره
ليا امسانا وحل الليل واظلم والنجم سهران=ترى هذا نديمي لاسرى قلبي بمشواره
وانا لوحمل قلبي مزرين في شيله ابليهان=يشيلنه معاليقن لثقل الحمل صباره
رفعت ايميني البيضا وصارت للشرف عنوان=وكفي يعرف اهل الجود واهل البذل مقداره
يمنيني هوى نفسي واضفه في ذرى الكتمان=ومن خوفي عليه البسه ثوب الصمت واخماره
ياليت اللي ظمي يلقى قراحن يروي الظميان=وليت الوقت مايلعب بنا ميسره واقماره
ركب من وارد السبعين هافن قال ذا مافان=مايدري وارد الفينه وسبعه داج بالحاره
وصلنا علمكم ياشايلين مسنن العيدان=على المقفين فالمجلس اهل نمه وعياره
ولوقالو بعقلك خلتن قلت العقل ميزان=انا ماني بمجنونن تقطع جلده اظفاره
ولاني عبد مملوكن ولاراعن من الرعيان=انا حرن عطيب ضروب يثلج صدر صقاره
وانا بانصحك يافرعون لاتنصب على هامان=شريكن لك بألاعيبك لكن انصب على غاره
وطيت بعرش رجلي روس افاعيها مع الديبان=على ملعونتن خاطت بنسج الغدر مكاره
وترى ماتضمرونه ما اخلص الداين من الديان=سفينة نوح سارت وسط موج البحر واخطاره
وانا ماامدحك يانفسن خلق الله بمن(بماء)مهان=ولكن عز ذاتك هو وسام القلب واشعاره
وصلاة الله على محمد عدد ماسارت الركبان=على دعوى الخليل بحج بيت الله ومن زاره