يا الله ياواحدن معبود ياحي ٍ سميع ٍ عليم=ياعالمن بالامور المبهمه في مغلقات الصدور
الخافض الرافع الباسط مليك الملك رب ٍ رحيم=ماياخذ العبد باسباب الذنوب ومعضلات الامور
وسبحان رب ٍ عظيم الشان في ذاته جواد ٍ كريم=ندعي ونرجيه ظلن في ظلال العرش يوم النشور
ياذا الجلالي وذا الاكرام يالدايم عزيزًا حكيم=بامره ولطفه يسيرن البواخر وسط هوج البحور
ولولا علينا تمنن بكرمه تهنا بليلن عتيم=ارسل علينا من الرحمه رسولاً معه وحي ٍ ونور
واخلاف هذا نبى ننشدك ياللي بالدعاوي فهيم=يامدعي بالمعَرفه وأن لك بين العواريف شور
يوم انك اتخايل اخيالاً مقفي راح سبق الظليم=تنحاه من مطلع الشمس الهبوب وحدرنه حدور
والله لو انك تخيله من ضحى لعصير جهدك عقيم=ما انته سليمان تجري الريح وتخاطب لسان الطيور
اهرج بكيفك على كيفك وشبريتك وسط البريم=وأن كان سليتها فاصبر على لطم الفهد والنمور
والناس قالو ترى العقل السليم ابكل جسمن سليم=وانته مريض الجسد والعقل مهما قلت فأنت معذور
انته كما اللي يبى يفرض على الريجيل نفسه زعيم=مايدري ان اليدين اتطول لا وصلت يديه النحور
وترى الزعامه لريجيل الزعامه كل حرن عديم=عزيز قومن يقود الضيف لقهوته دنين النجور
وكان الزمن زان لك تراه مثل الفي من تحت غيم=والعمر فاني وبين الناس دورات الليالي تدور
وان كان تبغى الحقيقه من يبى يسوي سواتك غشيم=ايطيح في يدين قومن يطحنونه مثل طحن البذور
ولا انته بمخلف خطايه لاتسير بدربها المستقيم=والله ماانته لي اكبر هم لو دمك بعرقك يفور
انا كما النجم عال ٍ مستواي وبين ربعي حشيم=ما ذل نفسي على درب الفضيحه لو زماني يجور
و انته كما الرعي فوق القاع تحت الشمس غادن هشيم=حتى البهايم تعافه ما يقشه غير عج ٍ يثور
بغيت فرقاك ومفاختك مثلك مايجي لي نديم=ليا زل شرواك عني .. يوم عيد ومن دواع السرور
انا اشهدن الذي رافق رجيحين العقول ابنعيم=ميرالبلى ان جاك خبل ٍ وامحطوطن مثل جسر العبور
ياشينها رفقة ٍ جمعهم ابليس اللعين الرجيم=تجمعو للردى والطيب مامروه حتى مرور
واللي يطالب سميحين النوايا دون حقن سقيم=مايدري ان اللذي ماهو لوجه الله يضيع ويبور
واللي يعامل نظيفين الضماير بالمخادع لئيم=خبيث واخبث من اللي فوقها حامت طيور النسور
والشعر عند العرب له منزله مصيون من كل ضيم=ماني بغاوي قطفت من المثايل مثل قطف الزهور
والرجل يصدع بصوته لاهرج والنقنقه للحريم=ولاطوع اركاب نفسه فاليال السود كود الصبور
الصبرسهمن رهيف الحد مثل ميتمات اليتيم=اصبر وخلك قنوع ولاتعد ايامها والشهور
فالرجل لاجا طويل السان يذري بين سين ٍ وجيم=مشفوح نفسن يبى يترك كما بيتن خراب امهجور
تبراه الايام لين يروح حاله مثل حال اليديم=يفداك حاله هوى فالجم يومن اجذبته السيور
واختامها بالصلاه الدايمه ومع السلام العميم=واعداد من يبعثون من المجادث يوم بعث القبور
واعداد مايبرق ويرعد خيال ٍ قام يردم رديم=اليا سقى ارضن بوبله وارجعت تمحى سنين العسور
واعداد ما يارد الميراد بالكنه عطاشا وهيم=على النبي الشفيع ابساعتن كل الخلايق حضور