يا الله ياللي نطلبه دايم الدوم = يا مخلف النية بنقص العزايم
الكبد ما تقبل من الزاد مطعوم = من شافني كني عن الزاد صايم
البارحة عيني قزت عن كرى النوم = يوم الثريا قابلت للنعايم
تخالفت بالقلب قالات وهموم = يوم الشكالة ما تهم البهايم
بالليل أهوجس لي بقالات وعزوم = للروح خلاق وللعمر سايم
ذولا نصالحهم وناس لنا قوم = وأكوان يشبع غبها كل حايم
لما سكنا نجد من غير معلوم = بصولات فيها صافي الجو غايم
يا نجد ما والله سكناك بسلوم = ولا أنت بورث جدودنا والقدايم
يا نجد أخذنا فيك حق ومرسوم = وصفا جنابك عقب نطل العمايم
خذناك عقب مدارك العمر والسوم = سوم يخسر لابسات اللثايم
كم خايع بين الخفيفين ما سوم = كل يبيه وواصلين الكضايم
عاداتنا نرعى الخطر دايم الدوم = يرعى دبشنا فيه والحظ قايم
نرعى بربع كنهم دولة الروم = مركاضهم بالضيق يجلا اللوايم
لا صاح صياح الضحا جن حثلوم = الخيل بالفرسان عجلا همايم
يازين سجتنا على الفطر الكوم = يوم بلاش ويوم جبنا الغنايم
لو الخيال مسرح من ضحا اليوم = أمطر وسيلة دم روس العدايم