راكب اللي حسها تسمعه من كل صوب=مثل زلزال الرعد فالمزون المظلمه
كنها يوم استدارت وضاقن الدروب=فرخ شيهان على الطلع ينهض مقدمه
تلها جورج الخواجه ونطحها الهبوب=واعلنوا باطفاء الزقاير وربط الاحزمه
اسم الكابتن خواجه ماهو لباس ثوب=معطيها (فـــودقا)سك ومنشع دمه
من سلايل شايب ماجمع غير الذنوب=والديانه عكس الاسلام ماهي مسلمه
مايعرف يقول هذي شمال وذي جنوب=الدليله بوصله والحروف مترجمه
واهني اللي على متنها حصله ركوب=ان رجع والا توفى عسى الله يرحمه
ان نوى مشرق الشمس والا للغروب=المهم يلبي اللازم اللي يلزمه
فاقدن لي شيخ قوم عزيز ومحسوب=محزم للضيق ياحظ منهو محزمه
والجفا بين الاصحاب عيب من العيوب=والصداقه من بنا بيتها مايهدمه
والغلا والكره ماتسكن كود القلوب=بس مافيه قلب فيه الثنين مخيمه
والرجل لا صار له بيت مذرا ومحجوب=استوى عند النشاما وجوده وعدمه
آتحمل مزح الاصحاب عذبين السلوب=وآتخير وافي التمر واطش عجمه
واعرف الكذبه لا جت من فم كذوب=لاقعد يرفع لسانه ويرخي برطمه
والطرب لامن جرفني مع اللحن الطروب=انسف البيت المدمدم على اللي دمدمه
واقفل الجوال عن راعي الغوج الهذوب=وافصل التعميم عن بيجري وعممه
زلة الطيب ماتجرح متنين الجنوب=عقب اللي زلة من صحيبه تفحمه
ايه يا(ضيدان)والناس حارب ومحروب=والاعادي كل واحد بحبره وقلمه

صح لسان قايلها والف شكر على هذا لنقل الطيب