|
قصتي مع الـجمل بدون قصيده
السلام عليكم
مسائكم عسل ياعسل انا صراحه عندي قصه صارت معايه وياريت واحد من الشعاعير يالف لنا عليها قصيده حتى يكتمل المشهد في يوم من الايام قبل سنتين تقريبا وعلى ما ادكر كان يوم احد جا على بالي اشتري جمل ايوه جمل مره وحده قلت منها يتسلو البزوره عليه ومنها اصير راعي بل عشان اخواننا في الدوام غالبيتهم بدو وتعال شوف كل كلامهم عن الجمال من الصباح حتى نهاية الدوام وصراحه كبرو الفكره براسي اني اشتري جمل الموهم رحت داك اليوم ابترم بمحل الجمال بدي اشتري واحد وقفت سيارتي وطبيت على رجولي اتجول واشوف اسعارها والله والاقي داك الراجل وعندو شبك كبير فيه جمال كتير شي ابيض وشي احمر وشي اسود من هو شافني قال تعال ياولد تعال واجيك ماشي جهتو وسلمت عليه وقلتلو حبيبي انا بدي اشتري لي جمل كم سعرو؟ قال وش تبغى قوده والا فحل والا ثلاجه علمني قلت ياعمي لاهدا ولاداك انا بدي جمل صغير مرررره قال يعني حوار قلت ايش هو حوار قال هذا سلمك الله ولد الناقه الصغير نقو له حوار قلت هو هدا حوار قال شوف عندك هذا عمره 4 اشهر يصلح لك والله واطل فيه الا ماشالله تبارك الله شكلو حلو ويناسب للبزوره قلت يالله ياعم كم سعرو قال هذا الله يسلمك ب1100 ريال قلت ياهوووو غاااالي مرررررره قال مدها والله وامدها قال شدها وانا اشدها اللي هي يدو قال والله انا بايع اخوه امس بنفس السعر كان يناسبك ب1050 فاشتري قلت لا انا ابغا اشتري ب900 ريال المهم مني ومنو ومابين شدها ومدها اتفقنا على 1000 ريال قلت هيا ياعمي انا بدي سياره اشيلو فيها قال طيب وهو يكلم بجوالو واحد من جماعة ربعو وشوي الا هو جاي معاه ونيت واتفقت معاه يوصلو لي ب50 ريال ومشيت قدامو وهو ورايا حتى وصلنا للبيت سألني وين حوشك والا شبكك يااسحاق قلت يابويا انا بحطو فوق السطوح يلعبوا عليه البزوره ضحك الراجل وهز راسو كانو مستغرب المهم قلت اصبر بنادي اخواني ونتساعد كلنا نطلعو الدور التالت والله واناديهم ونمسك الجمل ونمشي بو شوي شوي مع الدرجان حتى طلعناه فوق الدور التالت وانادي ام ايمن والبزوره يشوفوا الجمل وصراحه امبسطو مرره منو وقلت اسمعي ياام ايمن لاتفتحي الباب وتتركيه لازم تتأكدي تسكريه بعد ماتحطيلو اكلو وصرنا نديه من بقايا الطعام حقنا واحيان نحط لو برسيم او عيش ناشف وحب جلــــــس الجمل تقريبا اكتر من سنه على دا الحال وفي ليله من الليالي اتلبارده في الشتاء وكانت الساعه تقريبا تلاته الصبح الا ام ايمن تصحيني _ ابو ايمن ابو ايمن اصحا ياراجل اصحا والله واصحا من النوم وانا مفزوع اشبك يام ايمن ايش في ؟؟ قالت يا اسحاق الجمل عمال يجري بالسطوح وصوتو واصل اخر الشارع قوم شوف لك حل قبل يطيّح السقف علينا واقوم اجري على السطوح واطل من خرم الباب الا الجمل يجــــــري جري ويرغي وطالع من فمو حاجه بيضا واجي نازل اصيح يام ايمن هاتي التيلفون بسرعه خليني اكلم الدفاع المدني يشوفوا لنا حل في دا المصيبه جابت ام ايمن التيلفون وادق على الدفاع المدني وكانت الساعه حوالي تلاته ونصف تقريبا الفجريه الو نعم سلام عليكم وعليكم السلام الدفاع المدني معاك الدفاع المدني الحقونا بسرعه في شارع ........ تقاطع ..... عماره رقم .... صلي عالنبي واركد ايش القصه ياعمي انتو تعالوا وبعدين تعرفو القصه انا لله وانا اليه راجعون حبيبي عندك حريق لالا اكبر من الحريق يمكن ينهار السقف لو تأخرتو بسرعه الله يخليك وش موضوعك ياخي وش قصتك اطلع فرقه على الفاضي حبيبي عندي جمل فوق السطوح والجمل عمال يرغي ويجري وخطر يجيب السطوح فوق روسنا جمل ؟!!! وش اللي جاب الجمل يابويااااا مو وقتو الحين تعالو بسرعه واكرر عليه العنوان واسكر السماعه جلسنا حوالي ربع ساعه الا هم جايين ثلاثه عساكر وضابط معاهم جيب نيسان بس كنت انتظرهم اسفل العماره ولما شفتهم جريت عليهم وقلت اطلعوا اطلعو الجمل فوق طلعوا وشافو اللي حاصل بعيونهم قلت للضابط هيا اتصرفوا طل في وقال انت صاحي ؟؟ قلت من شويه صحيت كنت نايم وصحتني ام ايمن وقالت ... قاطعني وقلي انت مو قادر تنحره وتحطه بثلاجتك وتريحنا ؟!! قلت ياحضرة الضابط انا ما اقدر انحر فرخه مو جمل قد دا قال خير يصير خير نزل هو وعساكره ولما وصل الباب قال عندك سكين قلت عندي قال اديها عبدالله اللي هو معاه بالدوريه وهو ينحره وانت اتصرف بكره جيب لك واحد يصلخو ويفصلو وحطو بثلاجتك قلت ياعمي انحروه وخدوه بس لايبقى فوق السطوح يجري زي كدا ضحك هو واللي معاه وجبت لهم السكينه واديتها عبدالله ونحرو وقال هي انت لما تشرق الشمس روح لأي جزار يكمل الباقي لك وبكدا تنتهي قصتي مع الجمل وتوبه من دي النوبه اشتري جمل |
هههههههههه
جمل مره وحده ياسحاق بخاري والله منت بهيّن اخاف المره الجايه تحط ولد اسد .. تسلم على قصتك الجميله ... وتراني نقلتها للمجلس المفتوح وهو المكان المناسب ... بعد اذنك .... تحياتي |
ههههههههه ماشاء الله ياإسحاق واصل بإبداعك |
هلا وغلا بك اخويا مرزوق
ايوالله جمل ايش اسوي قلت يمكن يمسك البزوره ويتسلو ومنها يصير اليف ماكنت داري انو بيجيب لنا كارته لاكن ربك ستر شكرا لك وانا صراحه كان غرضي من يوم حطيتها بقسم القصص والقصائد ابغا واحد من حقونكم الشعاعير يألف قصيده على هدا الموقف يعطيك العافيه |
شكرا لك اخويا اسير الصمت
بس ماكان فكيت الأسر على الأقل هنا وقلتلنا رأيك على كل حال الله يخليك ياسيدي وراح اشارك باللي اقدر عليه شكرا لك |
.. هههههه قصة في منتهى الفكاهة ـ خاصة وإنها واقعية .. يا اسحاق قل لنا أي قصة صارت معك حتى لو ماتعتبرها تضحك بالنسبة لك .. لكن عندنا أكيد مضحكة في إنتظارك .. |
هههههههههههههههههههههههههههههههههه
اللي مايعرف للجمل يرقيه فوق السطوح مشكور على القصة وتحية عطرة لك |
مشكووووور اخوي اسحاااق
====== على القصه الرااائعه |
| الساعة الآن »05:53 PM. |
Arabization
iraq chooses life
Powered by
vBulletin®
Version 3.8.2
.Copyright ©2000 - 2025, Jelsoft Enterprises Ltd