ما للبيوت العامـره طعْـم يـا حمـود=إذا خلَت في يـوم مـن حـسّ شايـب
بيبانهـا طرْمـا وجدرانـهـا سُــود=ويصفـق نوافذهـا قـويّ الهبـايـب
في كل ركن لحزنهـا اثبـات وشهـود=علـى فـراق مهَوِّنـيـن الصعـايـب
النادرين أهْل الشـرف منْقـع الجـود=شيباننـا اللـي يحْسمـون الطـلايـب
إخوان من طاع الولـي خيـر معبـود=اللـي مكارمهـم مـن الله وهـايـب
ما يعرفون الزيف في اليُسْـر والكـود=صـدْق وبيـاض ورحمـةٍ للقـرايـب
ثباتهـم فـي حـزة الضيـق مشهـود=وإيمانهـم يـزداد عنـد المصـايـب
كانوا هنا .. وكان السعَد مالـه حـدود=وكان الرضـا يمـلا قلـوب الحبايـب
كانوا هنـا .. مفاخـر آبـاء وجـدود=ونـور وأمـان ووقـفـةٍ فالنـوايـب
واليوم كل اللي مضـى صـار مفقـود=وَلا بقـى غيـر الجـروح العطـايـب
يا حمود لوّ أبكي سنَه حزن ..واجـود=بدمـوع فقْـدٍ مـن عيونـي سكايـب
على الذي ذكْره مـعَ النـاس محمـود=الطاهـر اللـي مثـل وبْـل السحايـب
أبوي .. وانت ادرى .. وَلا بالحكي فود=ما يندمل جرحـي وَلا الكيـف طايـب
الوضع غير وما بـه سهـود ومهـود=مـن يـوم خلّينـاه حـدْر النصايـب
نهـار غابـت بسمتـه ذابـت كبـود=وشفنا ما عفنا فـي زمـان العجايـب
ليت المنايـا لا لفـت تطلـب الـزود=مـا تاخـذ الا الناقصيـن الـزلايـب
روس ٍ كساها الشيب ما صانت عهـود=ومن ظن فيها يصبـح الظـن خايـب
هرّاجة المجلـس حجـا كـل مقـرود=بيّاعـة الذمّـه بـسـوق الجـلايـب
الرَّجـل فيهـم لـه عضـلات وزنـود=هيكـل فحَـل والقلـب فالغـيّ ذايـب
ذليل .. لا يحـذف ولا يجمـع حيـود=نقص ٍ على الأجواد حاضـر وغايـب
يا الله يا معْطي العطـا غيـر محـدود=وإيماننا بكـمـا دخـل بـه شوايـب
إجعل مقـرّ ابـوي فـي ظـل ممـدود=بجنات عـدْن أم الغصـون الرطايـب
وأحْسن عزانا فيـه يـا خيـر معبـود=لولاكـما نصبـر بـلا حـسّ شايـب