العام قلبي معذّبني يبى الدّيرة = واليوم ما يعشق الديرة ولا همــّـه
قلبي ما غير أشغله عقلي بتفكيره = وأنا ضحيـّـة ثنينٍ ما لهم ذمة
خلوني أقعد وراحوا يالله الخيرة = مع بنت شيخٍ يصرّ العلم في كمه
بنتٍ صغيرة وعندي ما هي صغيرة = أشوفها عندي أروع بنت في الأمة
لو شافها اللي مايعرف للهوى سيرة =يلزم شعر رأسه ويخطيه ويخمـّه
من زينها خلّت العقـّال في حيرة = أطيب ولد عمّ يحـْسدها ولد عمه
الزين ما يستطيع العقل تصويره = بس الأكيد إنــّـها ترقص على القمـّة
أخذ عليها القمر لفة وتدويرة = قالت وش المشكلة قال أنتي مهمة
والشمس قدّام تغرب جاتها مغيرة = وفلّت شعرها الطويل وقامت تلمّـه
والورد الأحمر بهيج اللون ما غيره = من حينما شمـّته والشمة الشمة
راح يتثنى على بعضه من الغيرة = وعلى شفاها تكسـّر وانتثر دمه
وترياقها للمزاج أقوى من البيرة = رشفة منه تِـنْــسِــــي الواحد حليب أمه
والباقي من الوصايف تمّ تشفيره = لو أتمادى شويـّة جيت بمطمة
الحبّ أبا أموت وأنا أدفع فواتيره = ماهو برايح وباقي شي في الذمة