يامل قلبً من عنى الوقت غنا = حده زمانه للعنى والبهاذيل
لا قلت ياقلبي وش اللي تكنا = قال أنت تدري وش بقلبك من الويل
قلت الهوى قال الهوى ما شحنا= ولأهمني حب الرموش المظاليل
ولأهمني لوالعذاراء فتـننا = ولا همني لو يلبسن الخلاخيل
قال أنت تدري وأسمع العلم منا = قلبك هواه منومسات الرياجيل
عوج الرقاب اللي منول لهلنا = اللي كسبوها من شيوخً مشاكيل
ماجت بحب خشوم بالفعل جنا = بحدب السيوف المرهفات المصاقيل
واليوم أشوفك باركن يا جملنا = وأنته منول تنقل الحمل وتشيل
قلت الجمل يا قلب حده زمنا = ولوهي بفعل أذراع لقدم على الخيل
رح أنشد التاريخ ينبيك عنا = ويعطيك علمٍ واضحٍ دون تظليل
ويشهد لنا واد الرشا كم زبنا = لا جاء نهارٍ طايح القوم ماشيل
وابو دخن والنير يشهد وحنا = آلاد روق أليا عصى كل حلحيل
وعلى الشعيفيه فعولً شفنا = يومً على العدوان أسود من الليل
ويشهد لنا نجد المسمى وحنا = نسبق على العليا وشرب الفناجيل
واليوم يا قلبي كفى ما تمنا = الطيب اللي يملك القرش وبخيل
وانا على اللي تهتوي ما تونا = ولا لي على المكتوب دبره وتبديل
والحمد للي عزنا في وطنا = في ظل أبو متعب زعيم الحلا حيل
عشنا بأمان الله وجوده وأمنا = ونعلن ولانا للوطن جيل من جيل