السلام عليكم ورحمة الله وبركاته
اسعد الله اوقاتكم بكل خير
هذه نوادر مختاره قيلت في الفنجال ( اتمنى ان يحوز اختياري استحسانكم )
قم سو فنجال بعض مـاه مبيـوت=غر السحـاب منزَلـه مـن هللها
طبخة كريم طيب الهيـل منعـوت=واحمس على جمر قد اقفـا شعلهـا
دقه بنجر وثولث النجر بالصـوت=يجذب رجـال مـا نـدور بدلهـا
(هــادي الـشـعـرا )
يامسوي الفنجـال كثـر ابهـاره=عده لابن عران واثنه لابـو ذيـب
وضويحي الجـروي متيـه ابكـاره=وجديع يا ستر البنـي الرعابيـب
(هادي بن شعوا الخنافـر))
فنجال بن خنتـه تقعـد الـراس=والزعفران مقطـع فيـه تقطيـع
انا يعدا لـي ولـو فيـه جـلاس=هراجـة المجلـس قعـود مهانيـع
اللي لهم همـز ولمـز ووسـواس!!=في ساقة الاجواد همـز وتراتيـع!!
(عضيـب بـن حشـر )
قم سو فنجال على خمسة اجنـاس=احذر تجي حرقـه وبالـك نياهـا
خلك لها عن كل عذروب حساس=قيس لها الطبخه علـى قـد ماهـا
حتى يجي فنجالها يجلـي الاعمـاس=عقب الصلف والسهر مكبر غلاها
(مشـاري بـن ربيعـان )
ياما حلا الفنجال فـي كـل حـزه=في مجلس ما سفـرو لـه بقـازي
واللـي يسويهـا صبـي مـنـزه=شطر بها ماهـو سـواة الخنـازي
(عيد بن خلف العاصمـي)
ياصابيـن البـن صبـوا لناصـر=صبو لـه الفنجـال قبـل يـذاق
يركب على صفـرا نظيـر نايفـه=ويحلب لـه عنـد العتيـم فـواق
(حويـدي العاصـمـي )
قم سو فنجال ترا الراس منـداش=لعيون من قرنه على المتن مرجـود
في دلـة مربوبـة كنهـا الشـاش=وبهارها كف من الهيـل والعـود
الهيـل كثـر ولاتوانـا ولجـاش=والزعفران اقنع على شذرة العـود
(مشعـان بـن هــذال)
قم سو مايجمد على الصين ياذيـاب=بدلال وصف للقطـاط المحاديـب
ونجر يصيح وللمساييـر جـذاب=دنه على طول الدهر للمواجيـب
اليا ذلق فنجالهـا كنـه خضـاب=ورسى صبغ بكفوف بيض الرعابيب
(هايـس بـن مـجـلاد )
ياما حلا الفنجال مع سيحة البـال=في مجلـس مافيـه نفـس ثقيلـه
هذا ولد عم وهـذا ولـد خـال=وهـذا رفيـق مـا لقينـا مثيلـه
(راكـان بـن حثلـيـن)
والله لـولا مـزة العظـم مــره=وفنجال بن عشـرَ عفـر بهـاره
لا اخذت من زين الغلاوين جـره=اتبعتها الفنجـال يطفـي حـراره
من واهج بالصدر ياكـود حـره=لا فار يضرب بالنواظـر شـراره
(مـحـمـد الـعـونـي)
صبـه ومـده ياكريـم السبالـي=يبعد اهمومي يوم اشمـه بالانفـاس
فنجال يغدي مـا تصـور ببالـي=وروابع تضرب بها اخماس واسداس
(محـمـد الـسـديـري)
ياسايق الفنجـال عـده لمـدوخ=واثنه لابن صلال هـو والجـلاوي
وانا زبون الحرد ابـو ضيـف الله=لا كلّح الشارب عـن الشفـاوي
(شليـويـح العـطـاوي)
قم قرب اللـي عنقهـا كنـه وزا=انا لها من ضيقـة البـال منحـاز
فنجالهـا بيـن الشفـايـا يـمـزا=اشقر ومشروبه على الخمـر يمتـاز
( محمد الاحمد السديـري)
مع دلة صفراعلـى النـار مركـاه=وابصر بصتها على شـف روحـي
فنجالها يشدي خضاب الخونـداه=الجادل اللي عند اهلهـا طموحـي
(ذعار بن مشاري بن ربيعان)
الله علـى مـزة سبيـل العراقـي=اصغر بجيك بلوذة التتـن مفـروك
وفنجـال بـن ماهـواه الحراقـي=وصينية يركض بها العبـد مبـروك
صبه لمـن يثنـي علـوم التلاقـي=لاصار عند قطيهن ضرب بيلـوك
(الـنـوري الشـعـلان)
