ياراكب اللي لامشى ياصل الدار=جمس عديم الوصف لونه سماوي
تسعه جديد مجهزينه للاسفار=هو منوة اللي طول عمره شقاوي
مقطوع عن كل المشاكل والاخطار=ماوقفه راعيه عند القهاوي
لولا الفرامل والنمر تمسكه طار=ودايم على قطع المسافه رهاوي
ماحافه شريطي ولا حد باسعار=وراعيه ماباعه ولا هوب ناوي
فوقه شجاع حافظ كل الاسرار=يوصل المكتوب ماهوب غاوي
ممشاه من عرعر قبل وقت الاسحار=والعصر في ديره هل العز ضاوي
ملفاه شيخ من وفيين الاشبار=عبد الله ابن عون زبن الجلاوي
راع الكرم والطيب والجود والكار=وريف الضعيف اليا بلته البلاوي
يامعشي الضيفان ومعزز الجار=وذباح حيل مولوه الشواوي
له مجلس مدهال لصغار وكبار=ياسعد منهو لبو نايف مخاوي
شبل الاسود مطوعة كل الاشبار=حمياة التالي نهار العزاوي
يافزعة ( الروســــان )اليا حلت الدار=لجا لزوم دون ربعه فداوي
فك السجين اللي شرب كاس الامرار=مصبر على قيد برجله يلاوي
ماجاه علم ولا سمع منكم اخبار=والموت عنده والحياه متساوي
ينخاك يامشكاه في كل ماصار=تمشي بموضوعه وتنهي الدعاوي
صابر وكني يابونايف على نار=وجرحي بقلبي مالقوله مداوي
تمت وصلى الله على سيد الابرار=عداد ماينطق من القول راوي