ترفق يا حمام الـدوح = دخيلك حبي لا تجحد
وحبي لك ترا مفضـوح = وكل الناس به تشهد
أحبك يا عديل الـروح = وحبك شد قلبي شـد
والا يالزين يالمملـوح = حبيب اليوم وامس وغد
أسر بحبي لك وابـوح = وحبك صار ماله حـد
وانا لي بك هوى وطموح = على قربك ترا محتد
وصال الزين يبني صروح= ويهدمها بكلمـة رد
بعد ما قام يبغى يـروح = قهرني يوم فيه لـدّ
وكفه مدها ويلــوح = ودمع العين فوق الخد
وعطر الورد قام يفوح = ويمكن فلّ مدري ندّ
سلبني شعره المنفوح = مثل ليل الشتا سرمد
مثل طير غدا مذبــوح = نفض قلبي منه وارعد
وكني بالهوى ملفــوح = وزاد الهم بي وامتد
دموع العين جات سفوح = على المريوش زين القد
ما غير أون ولا أنوح = كما غـرٍ يباله دد
أنا قلبي غدا مجروح = وعذبني كثير الصـدّ
ولا ينفع عذل ونصوح = بعد حلّ الهوى واشتد
حبيبي بسمته ممنوح = ودون الهم تبني سـد
ولو يخطي ترا مسموح = مادامه جنبي ما أبعد