تعال يامرزوق والقاسي يلين=نبا نسولف والسوالف عانها
وين البعير أشعيل ابو جنب(ن) متين=دارت به الدنيا على ذرعانها

هات السوالف هاتها والله يعين = ماتشتكي نفس ٍ وربي عانها
العلم عندك ياعشير الغانمين = ذي حالة الدنيا وهذا شانها

أمسيلمه تبغا تحكم المسلمين=صفحة زمن مار أنمسح عنوانها
من لا سعى للطيبه والطيب زين=يرحل وتبقا سيته بلوانها

إمسيلمه كـــــذاب مايلقى عوين =نفسه على فعل الرديه هانها
والطيب لهل الطيب مقصود ٍ ثمين = سلعه ماكل ٍ يستطيع اثمانها

الله يلوم اللي يلوم اللايمين=هزت عمود البيت هرج السانها
والله يخلي صاحب المد السمين=ولد النعيري لا شتبك دخانها

آآمين يالله لاتهين المخلصين = اللي يبون العدل في ميزانها
انته وانا ووجود كل الطيبين = البيت في راس الجبل مسكانها

عهد(ن) عليه والعهد مثل اليمين=واشره على منهو عهوده خانها
اني لكم ياصاحبي مثل اليمين=عز الديار العامره سكانها