ارحل بصمت بدون توديع وازعـاج= ما دامهـا فرقـا بـلاش نتواجـه
مافيـه داعـي للمذلـه والاحـراج= والموقف اللي ما لنـا فيـه حاجـه
حتى ولو انـي لشوفتـك محتـاج= قلبي هذاك اليوم واعـرف خراجـه
لو الهوى ينهد لـه عشـرة ابـراج= وتذبل غصونـه ويتكـدر مزاجـه
تبقى الكرامه فوق راسي لهـا تـاج= وش عاد ابي بالراس لا طاح تاجـه
غـادر بليـلً خرمسـي مظلـمً داج= قبل الفجر نـوره يحيـن انبلاجـه
وخل الجروح تبات في وسط الادراج= جرح المشاعر مثل خدش الزجاجـه
خبر فراقك ما يبـي لـه ريبرتـاج= ويوم الرحيل الجـو ثايـر عجاجـه
ما اقدر اوقف معك اسوي له اخراج= ولو ينعمل في فلـم يكثـر رواجـه
ولا احب اشوف غزيلً كان مغنـاج= بالثوب الاسود يوم عقّـد حجاجـه
يفداه من ينساق مـع كـل هـراج= ومع كلمة الماشي يبيـن ابتهاجـه
غروً حشيـم وفالدكاكيـن مـا داج= ولا ضيع اصله مع دروب السماجـه
سحر الطبيعه ما خلط معه مكيـاج= وطبع الحيا في سيرتـه وانتهاجـه
فرقاه ضربه دمرت سـوق الانتـاج= ومن عقب حلو العد نشرب هماجـه
يا صاحبي والحرف ينشج لك انشاج= والشوق من زوده تحطـم سراجـه
من دون دمع العين حطيت مـزلاج= والقلب يرسل لك شديـد احتجاجـه
زجيت به مكتوف في وجه الامـواج= ومع غيرك من الناس صعب اندماجه
من بعدكم وشلون ابا القى له علاج= وانته وانا نعـرف طريقـة علاجـه
تمت وعند مدبـر الكـون مخـراج= اللي ليـا ضاقـت وسـاعً فجاجـه