يارجلي اللي ماتوذي على الجار=ماهي على جاري كثيرة غثاها
ولاني على غرة قصيري بغدار=ولا ادور الغرات عند اقصراها
عذروب رجلي يافهد شبة النار=والى لفوا ضيفان جبنا عشاها
دقيت نجر(ن)دقته بن وبهار=وشبيت نار الليل يوضي سناها
شبيتها يوم ان ورعاني صغار=لين ان محسن قام ثم احتساها
عذروب رجلي للمناعير سبار=وتعدي المرقاب قدم اخوياها
انشد صنت يوم المظاهير عبار=وقطيم يوم انا نحول وراها
وانشد غويزي يوم لوذات الافكار=يوم احتمينا بوشنا من عداها
ويوم حمينا دونها الملح قد ثار=تشدي صواعق مزنة(ن) من سماها
نعم(ن)بربعي مابهم طق شبشار =كم جمعة صعبة كسرنا عصاها