نومك طرب وأنا بنومي هواجيس=ماسهرّك بالليل كثر الهمومي
أسهر إلى نامت عيون الهداريس=وبالليل اراعي ساهرات النجومي
قالو جهلت وقلت جهلٍ بلا قيس=الجاهل اللي مايعرف اليمومي
اشوف عدلات الليالي مقابيس=ولاإحدٍ من الدنيا عظامه سلومي
تضحك وتخفي لك خفيّ الهناديس=تفطر لها يومٍ ويومٍ تصومي
اعمل وتلقا وافهم العلم بالقيس=دنياك لو زانت تراها نقومي
والعزّ فوق معسكرات السواديس=الى قصدتّ اللي بالاشيا رحومي
قبّ تنازي بالنشاما كراديس=والطير في روجاتهنه يحومي
بالليل اصالي حاميات المحاميس=والصبح الاوي كلّ قبّا قحومي
اربع سنين ودمع عيني أماريس=العين تسهر كنّ فيها هزومي
صوابنا بالميل غمقٍ الى قيس=وطريحنا في مثبره مايقومي
انّ جنّ بنا مثل النعام الاماريس=لي خفّ عجلٍ مع رقاق الحزومي
استلحق اللي يطلبون النواميس=الي من الاقصين وادنى اللحومي
لاخير في كثر الحكي والتماليس=هرجٍ بلا فعلٍ يجي به وهومي
لومي على اللي ينقلون العبابيس=واهل الفرنج وكلّ رامي لحومي
عرجٍ بأهلهن كنّهن القرانيس=على الطريح مصوبراتٍ كظومي
الى سمك عجّ الرمك بالملابيس=الرابح اللي حظّ ربعه يقومي
حتى يزين النا المثل والتوانيس=والكيف طاب لمن يفك القحومي
من لايدوس الرأي من قبل ماديس=عليه داسوه العيال القرومي
ومن لايقلط شذرة السيف والكيس=يبدي عليه من اليالي ثلومي
ومن لاخذا الدنيا بميزٍ وتقييس=مثل اللذي يصبح بليلٍ يعومي
كلّ القلم من كتبنا والقراطيس=وركابنا من كثر الأقران تومي
الشيخ من يعطي الفقارى الملابيس=يبدّل الساعه بعزٍ يقومي
والحرّ لي بدّت عليه النواميس=يشهر وعن دار المذلّه يشومي
والى اقترب من بعض الاشيا نسانيس=اعزم ولا بدّ الفرج بالعزومي
باب الفرج لبسك نظيف الملابيس=ينجيك بأيام الكرب والزحومي
أوجس بقلبي مثل دقّ النحاحيس=الله يلوم اللي لحالي يلومي
يجلي صدا قلبي ضبيح المهاريس=لي قام شرّاب القهاوي يعومي
ودلال فوق النار دايم مجاليس=اكرامهن حقٍ علينا لزومي
من صنعة الصبّه وخمس التخاميس=بريةٍ يعمل بها كلّ يومي
وبهارهن هيلٍ بليّا حواسيس=كيفٍ يعدىّ للنشاما القرومي
عدّه لحمّاي العياد المراويس=والاّ الحصان اللي بقينه يهومي
وصلاة ربيّ عدّ رمل الطعاميس=على شفيع الخلق يوم اللمومي