ماعلموَك أنك صغيرّ ومطفوق = للبنت دار وللرياجيل ملقا
حنا عتيبه الهيلا برقا مع روق = واللي يرحب بالسلاطين يبقا
ماذلنا من خلقة الأرض مخلوق = أهل المكارم ربعي روقٍ و برقا
ننده بسامينا وتابس بها احلوق = وكل الأيادي بقضب أيادينا عرقا
كم شاربٍ من فعلنا صار محلوق = جعل الوجيه اللي بها اشناب تسقا
الغيمه اللي وسطها ربعي بروق = الي تحتها بوبل الأمجاد غرقا
نجد العذيه فوقها شمسنا شروق = وصارت سماها بالسلاطين زرقا
ربعي عتيبه وبارد الوجه مصفوق = والسبت من حطه ترا الأحد يلقا
وين أنت يابو صوت مبحوح ومخنوق = ياللي على كثر السوالف تسلقا
يوم البضاعه غاليه داخل السوق = حنا شرينا اللي اخذتوه سرقا
رمح القهر في صدر الأيام مدقوق = في غرب راسه وآخر الرمح شرقا
أيه أفتخر وكل مطرود ملحوق = بالفعل ماهو بزود حكيً وقرقا
حنا بشر بس الولي حطنا فوق = الله خلقنا فوق وشـ عاد نرقا
الله خلقنا فتنه لكل غرنوق = ومن العذارى ميته كم طرقا
منطوقنا جزل ومع جزلنا ذوق = يطرب لنا فوق الغصن طير ورقا
قبيلتي مالي مع الناس معشوق = وأنتي غرامي دون لقيا وفرقا
بين الضلوع العوج موطنك معلوق = ياأطهر من الطاهر وأصفا وأنقا
لو غنوا الشعار مليون طاروق = محدً يجيب اللي أجيبه على القا
الشعر جسم وحنا في قلبه عروق =كل حرف روقي وكل طاروق برقا

المشاركة الأصلية كتبت بواسطة سهم العضيان سياف يعطيك العافيه على النقل وصح السان جابر بس لوتجيب القصيده السياسيه ابرك تقبل التحيه