الهيـــــــــــــلا *** منتدى قبيلة عتيبة
صفحة 1 من 2 1 2
عرض 40 مشاركات من هذا الموضوع لكل صفحة

الهيـــــــــــــلا *** منتدى قبيلة عتيبة (http://www.otaibah.net/m/index.php)
-   المحاورات المنقولة الكتابية والأراء النقدية (http://www.otaibah.net/m/forumdisplay.php?f=66)
-   -   سفر الدغيلبي يسحق تركي 2000 في اول لقاء بعد المقاطعة (http://www.otaibah.net/m/showthread.php?t=26529)

فرناس 01-Aug-2006 08:14 PM
سفر الدغيلبي يسحق تركي 2000 في اول لقاء بعد المقاطعة
 
مساء الخار يالربع

يتسائل البعض عن تصريحات تركي الفين في بداية العام عن رفضه اللعب مع سفر الدغيلبي وصرح في قناة فواصل الفضائيه بانه ماراح يلعب مع سفر الدغيلبي والسبب هو المحاورة الي قال فيها سفر الدغيلبي لتركي2000 :

انت في تال الزمن قصتك قصـه
كل ما غلقت رصه جتك رصـه
ما ضرينا بالحلاو اللي تمصـه
عاشوا العتبان والبيرق سعـودي


ياهل الهـرج ممنـوع الخبـال=ارفـع الهـرج وابشـر بالسعـد
كان تبغـى المنـازع والجـدال=عندنـا علـم حبلن مـن مسـد

ومن بعد هالمحاورة اطلق تركي الفين صرخته رفض اللعب مع سفر الدغيلبي ومقاطعته نهائي


ولكن بعد فشل تركي واستغنا اهل الحفلات عن تركي في هالصيفية لعدم تمتعه بالشاعرية والنقض والفتل في ميدان المحاورة وانه شاعر صوت فقط لاغير

صار ماله سوق ورضى بالامر الواقع حتى انه في بعض الحفلات يطلبونه اهل الحفلات مع شعراء توهم يدخلون ساحة المحاورة

المهم طلبوه اهل حفل مع صاحبه الي اعلان مقاطعته وكان لابد ان يلبي الدعوة لان ماحد يدعيه بداء تركي الطاروق:



تركي

سلام تسليمتن تسوى رصيد اهل الملايين=ابديبها للقبايل في محل اهل الشهامة
يابن سعد صاحبك وشقاللك من قبل يويمن=الرجال مايسحب السكين ويقطع حزامه

سفر

يامرحبا الفين ضرب الفين تنصى تركي الفين=نكمل تراحيبنا بالفعل لمكمل سلامه
الي يبا يرضي الاقصين لحساب الموالين=هذاك قله يويق الصبح في ريع الندامة

تركي

الضرب والجمع في الاعداد والى في الميادين=ياراعي البشت لبس البشت مع راع العمامة
اضن لبنان راحت مثل ماراحت فلسطين=مابقي الا تهب الريح وتقوم القيامة

سفر

اخذتلك في ضواحي نجد والصمان شهرين=واليوم كنك تبا المعواد في ساحل تهامة
يابيلنا معركة كبرى تشابه يوم حطين=حتى نبشر مدورت السلامة بالسلامة


تركي

صاحي ويمشي مع الصاحين ويكب المجانيين=والي رقد في فراشه مايصحا من منامه
طاحت ضروس الجمل ماباقي الا فيه ضرسين=والمشكلة كان لامنه برك ثقلت عظامة

سفر

يومنها حرب هرج ومرج بالعون معذورين=ويمنها شوف عين لعين عيب الانهزامة (1)
تقول الامثال لاطاح الجمل جات السكاكين=واللوم ينصى البعير ولا على الخوصة ملامة

تركي

اليا استعدت حنا يالعتيبي مستعدين= الخوف مايجلس الى فوق بيبان الرخامة
ياطير من بعد ماجالك مخاليب وجناحين=خوى القرانيس لاترجع على بيض الحمامة

سفر

وين استعديت وانته نازح من ثرب ويمين=حربن عبر شاشة الجوال مامنها زعامة
انكرتنا عام الاول يوم لبسناك ثوبين=ثوبن ملون وثوبن مثل براق الغمامة

تركي

الله ولا الديرة الي ماسكنها الى الشياطين=البعد عنها نهاية بخل وبداية كرامة
العام قلولي انك صرت امام للمصلين=واليوم تذن ليامنك خلصت من الاقامة

سفر

الخوف والضعف يالمطران يخلن المراحين=والله لو الخوف عز لتدمر العالم نعامة
تسعير بعض العرب في سوقنا تسعير بنزين=تسعين لكن طويل العمر غير في نظامة

تركي

علامتك ياطويل العمر بين الخشم والعين=وشلون جت فيك والعتبان مافيهم علامة
صحيح والناس فيهم ناس ماتسوى ريالين=وبداية الوقت يابوزيد يدري عن ختامه

سفر

تجميع تركي سعودي والقطع من دولة الصين=والبدي مصبوغ والهيكل مثل عود الثمامة


(1) المقصود بهالشطر: هو مناخ عرجا الشهير الي انسحبت منه مطير ليل وتركت حليفتها قبيلة حرب تواجه عتيبة لحالها



وسلامتكم


فرناس بيك
|197|

ابو براك 01-Aug-2006 08:38 PM
مشكووووووووووووووووور
والله يعطيك العافيه
وصح لسان سفر الدغيلبي
ولاهان تركي 2000

مرزوق حمدان العتيبي 01-Aug-2006 10:44 PM
...
.


صح لسان سفر وتركي ..

..

محاوره طيبه جابها لنا وجه ٍ طيّب
لاهنت يافرناس.
.......
..

أبو نجر النفيعي 01-Aug-2006 10:51 PM
مشكووووووور


يافرنااااااس على هالمحاوره



وصح السان شعارهاااااا


ولاكن قيل ان به محاوره اقيمت بينهم قبل اسبوووع

افدنا بها ان كانك تعرف عنهاا شي


ولاهنت





تحياتي

يوسف السيحاني 01-Aug-2006 11:11 PM
مشكور يا فرناس على المحاوره الرائعه فعلا


كل منهم يمتازون بالصوت الرائع فعلا والمعنى ايضا لكن سفر لعب في تركي 2000 والدليل انه يقول ما راح العب مع سفر مره ثانيه واخير قام يلعب وياه ؟ الان سفر الدغيلبي يكسر تركي2000 واتمنى يستمر سفر على هذا النهج الرائع ؟



لا هنت يا فرناس

خالد اوصاهب 02-Aug-2006 12:01 AM
فرناس نشكرك على هذا الجهد

واشوف مكتوب تحت اسمك (( عضو نشيط )) اثرها ما جات عبث
واصل ياسنايدي وافنا بالاخبار الجزله ياجزل

وفعلا اشوف تركي متحطم الله يعينه
ياشين الانتكاسه

فتى وادي الرشا 03-Aug-2006 02:16 AM
قرناس مشكور على النقل الرائع وبيض الله وجهك ماقصرت

فرناس 06-Aug-2006 06:04 PM
مشكورين يالربع لاخلا ولا عدم

فرناس بيك

|197|

كاتب صحفي 11-Aug-2006 08:51 PM
غلطان يفرناس يولد عمي
 
غلطان يفرناس تركي قبل 6 ايام بضبط لعب مع سفر في شقراء حفله دعاجين وصوت محد بجاين مثله بصوت مع احترامي لسفر تركي شاعر شعبيته بصوت 100 في 100 وقال موال شوف كيف الهواء يلعب براس الهواوي بس بلحن المثل قال مالل الحمل الا جمالها والحفله بدات الساعه 12 وخلصت 3 الفجر وعجيبه الحفله وسفر مواله ناسيه اتذكر مايمشي على رجال واشكرك يفرناس ولاهنت بس لتصحيح المعلومه وتركي الشاعر الي مايبيه هو عبدالله الذيابي (الاعمى)مو سفر

الحاير 11-Aug-2006 09:50 PM
سلمت يمينك يافرناس
وصح لسان سفر الدغيلبي
ولا هان الألفين


الساعة الآن »06:26 PM.
صفحة 1 من 2 1 2
عرض 40 مشاركات من هذا الموضوع لكل صفحة

 Arabization iraq chooses life
Powered by vBulletin® Version 3.8.2
.Copyright ©2000 - 2025, Jelsoft Enterprises Ltd