الموت حق ولا عن الموت مهزام=لكن بعض الناس موته فقيده
ما دامت الدنيا ولا أحد بها دام=كم من عزيزٍ بالمنايا تصيده
مرحوم ياشيخٍ توطتك الأيام=شيخ المكارم والسجايا الحميده
شيخٍ من شيوخٍ لهم صيت واعلام=شيخٍ سجاياه الحميده فريده
شيخٍ على كل المواجيب مقدام=شيخٍ علومه كل أبوها مجيده
شيخٍ يهدي بالوغى كل صمصام=تهابه كبار الخصوم العنيده
ليت الأجل يدفع والأعمار تنسام=بالمال نشري له حياةٍ جديده
تركي حليف الجود غذاي الأيتام=لا جت شواحيف السنين النكيده
شيخٍ من شيوخ صماصيم حشام=لا جت تحاقيق العلوم الأكيده
عساه بالفردوس يبنى له خيام=في جنة عنها جهنم بعيده
في جنة الفردوس مع خير الأنام=آمين يا غافر خطــايا عبيده
لا جاء نهارٍ فيه ذوبات الأنسام=والعبد كشفت صفحته عن رصيده

بآخر شهر خمسه فقدنا فقيده=زين النبا للربع والضيف والجار
يوم الأحد شد وفجعنا شديده=الله يجيره في جواره عن النار
جعله شهيدٍ مع نفوسٍ شهيده=في جنة الفردوس منزلة الأبرار
بتركي ولد مقعد رثيت بقصيده=مرثيةٍ تبقى مع الحي تذكار
يـاالله يـاعالم سراير عبيده=خلقك تحت رحماتك كبار وصغار
يــاواحدٍ تقدر على ماتريده=تعفو عنه ياعالمٍ خاف الأسرار
يـــارب نفسٍ في لحدها وحيده=تنجيه يامنج الثلاثة هل الغار
المدح مـاينفع لو أني بجيده=إلا الدعاء بخلاص والرب غفار
تركي مجيد ومن رجالٍ مجيده=لذي حمد في المدح تاريخ وأشعار
المدح مـازال يتجدد رصيده=وسكان نجد تفيد عنهم بالأخبـار
من ضامري قولي شرحته واعيده=ومن شان أبوفيحان ببديه تكرار
ومـامر من عامٍ وما مر عيده=على النبي صلوا عدد وبل الأمطـار