قصيدة رثاء في المرحوم بإذن الله
الشيخ/تركي بن مقعد بن دحيم بن هندي بن حميد

يجذبني الطيب ولو انه بعيد=ماكنـــه إلا مني وخامساً لي
تركي اليا عد العدد فالصناديد=سلايل اللي يحتمون المتلي
رجال ماتدخل عليه المناقيد=ابن حميــد اللي بضيفه يهلي
شيخاً عليه أوصاف عنتر أبوزيد=ارثيه في الأبيات يوم أقبلن لي
موته فجيعه مكد العلم تأكيد=الساطي اللي فاللقاء مايذلي
اللي سوات الحيد وأقوى من الحيد=ينومس بطيبه وظله يظلي
اعـزي العتبـان من دون تحديد=وأخص ربع الشامخ المستقلي
فالعاقل الساطي صدوق المواعيد=ينقذ لمن يشكي من الوقت غلي
أنا اشهد اللي يستحق التماجيد=يشبه لسيفاً فاللوازم يسلي
يفزع اليا جاء في الدعاوي تعاقيد=ويحلها من صامل الراس حلي
ينهض الياهابت عظام الرعاديد=تشهد جميع الناس دقاً وجلي
ياصل وراء الحروه ليافز ويزيد=ويروح ضيفه خاطره مسفهلي
للواجبات يفز من دون تصديد=ماصـار به كره وضعافه وغلي
اليا تعزوا هجد الخصم تهجيد=برع اللسان محنكـاً مايذلي
الناس تفرح به مثل فرحة العيد=ياشين جورك ياالزمان المولي
أخذت من تشهد له الناس والبيد=من قال جيتك قال أنا جيت كلي
مرحوم ياالنــادر ملاذ الأجاويـد=مرحوم ياللي للهرج مايزلـي
يـاالله يامنش المزون التلابيـد=اللي تخلي كل قـاع امتملـي
ترسل على قبره من الشوب تبريد=وتحط له بجوار طـه محلي
آميــن ونكــرر دعانـا تراديــد=يــارب ياقابـل صــلاة المصـلي
يبقا العوض علوش منصا الأواليد=ومنصا كبار السن حظه معلي
ياخذ من جهود القطامي تجاهيد=فالمرجله ماضاع له ربع ملي
أقولها مالي بشعـري مقاصيـد=أكود مدح أهل الوفاء جايزاً لي
للطيب أشفق ماهو بزيد وعبيد=من جد ماقلتـه مـزوح وتسلي
يجذبنـي الطيـب يـالو أنه بعيــد=ماكنه إلا في العدد خامساً لي

الشاعر/عطاالله باخت الهجله المطيري