آه من قلبٍ نصحته مير علمي ما فطن له=ما استفاد من الدروس ومن غرابيل الليالي
إبتدا ليل القصيد وهاجس الخافق يملـّه=بين نسناس الجنوب وبين نسناس الشمالي
وكل ما هبّت جنوبيه وشعري قمت اهلـّه=ما ذكـَرت الا هذيك أم الترَف وام الدَلالي
جادلٍ من حُسنها قلب المغفل ما تدَلـّه=حُرّةٍ ما تعشق الا الطيبين من الرجالي
العنود اللي غلاها كل عرق ٍ يستحلـّه=استباحت كل صبري والتمني واحتمالي
أقبلـَت واستانس الخفاق واقلع من محَلـّه=وعانق اطياف الحبيبة واحتضَنها ما يبالي
من سقـَتني من غلاها كنّ خفاقي تتلـّه=بري حالي لو نعَشني صوتها يا بري حالي
جعل قلبٍ ماعشـَقها تصدفه تسعين علـّه=الغلا اللي ما يضمّ الريم ما هو راس مالي
لأجلها اسهر طول ليلي واسبر نجوم ٍ مطلـّه=أتحرّى طلـّةٍ لا شفتها يرتاح بالي
علـّموها انّ الغلا الصادق نعيشه ما نملـّه=والغلا الكذاب ما يسقي القلوب من الزلالي