هيّض ابن حصيص في تالي نهاره = ألف قاف ٍ في ضميره مدلجاتي
ياوجودي وجد مكسور الجباره = آخذ ٍ تسعين ليله مايباتي
أو وجود اللي خذا الحاكم دياره = خذ حلاله والحريم مسلّباتي
عقب ماهو تاجر وراعي أماره = صار فلاح ٍ واموره هيناتي
أرتحل يا فهيد منبوز الفقاره = آركي وحبال كوره كالفاتي
آركي ومربّع ٍ عشب القراره = ما علاه الشد من عشر سنواتي
ديرة الوشم ما فيها صقاره = غير شيبان وعجز محندباتي
من خشوم اكميت لي حد الزباره = جعل تمحل والوشوم مربعاتي
صاحبي بالوقف مدهاله وداره = ما سكن في ثرمدا والاّ مراتي
ولعتني بالهوى والزين ساره = دلهتني عن غنادير البناتي
يا حسايف بنت ذاك الجار ساره = عند ابوها تدّرج مثل المهاتي
ريق ساره مثل ( غند ) في غضاره = أو حليب ابكار عرب مسمناتي
والنهيد زبيدي ٍ في دعب قاره = في محير الماء القراح مصلّعاتي
والثنايا قحويان في زباره = زاهي نبته على كل النباتي
راس ساره ذيل شقراً وسط غاره = والجدايل بالرشوش مجدلاتي
والمطوع لو يشوف خديد ساره = طبّق المصحف وعجّل بالصلاتي
ما ذكر جار ٍ ذبح بالحب جاره = بالمبيسم والثنايا المرهفاتي
حالف ٍ ما نسى ولااسلى حب ساره = كود اهل شقرا يخلون الصلاتي
لايمي فاله حنيش ٍ في مغاره = سمّها يشظى العظام الصالباتي