يـا مـلّ قلـبٍ هـوى الغربـي كـشـف مـابـه= داخــل حـنـايـاه عـبــدٍ فـــي يـــدِهْ طـبْـلـة
مـا جابـت الـورق مـن زيـن اللحـن جـابـه= واكـبـر عـذابـه لـيـا طـــق الـحـيـا وبـلــه
مـن أزرق الريـش عـاف الصيـد مخـلابـه= كـبـده لـهـا حــول سـبـع سنـيـن منـدبـلـه
عـلــى ولـيــفٍ شـربــت الـســمّ بـعْـذابــه= وكنّـه علـى القلـب دَرّ الـلـي رعــت ربـلـة
كـنّ الولـي بــدّ عــن خلـقـه تـوصّـى بــه= مـن عـودٍ أزرق وغيـره مـن حصـا عِبْلـة
مــا قــد رفـعـت الـيـديـن ألا عـلــى بـابــه= طفـلٍ يـحـرّم عـلـى روحــي واوجّــبْ لــه
لـو شـافـه الـلـي تهـجّـد وســط محـرابـه= صـلّـى أمّ الاربــع ثــلاث وضـيّـع القِـبـلـة
ولـو شافـه اللـي بنـي عبـسٍ تعـزوى بـه= والله فـلا عـاد يـسـأل عــن هــوى عَبـلـة
عـلـيـه راعـــي الـمـعـمّ يـشـقّــق ثـيـابــه= وش لون أجل مَن عمر عشرين يلعبْ له؟
مـجـدّلٍ يـــا حـيــاة الـشــر يـــا خـضـابـه= ينقـض قرونـه علـى زنـدي واطبطـبْ لـه
وعـيـنٍ لسلـهـم بـهـا عــن ألـــف دبّـابــة= تلـعـب بــالارواح لـعـب الظـبـي والشَبـلـة
والجفـن يـا لعنبـوكـم كـيـف مــا آهـابـه = ؟مـن ذلّ سَـلْـم وحـيـاة الــروح تكـتـبْ لــه
والرمش لأغضى تشوف المـوت بأهدابـه= مـدري لـو المـوت ابــن عــمٍّ يـقـاربْ لــه
رمـشٍ علـى طغـوة السلطـان يـدعـى بــه= عـلـيـه قــلــب الـمـعـنّـى طــايــرٍ شَـبـلــه
لو فـي شجاعـة هـدب رمشـه معـي لابـة= المـوت فـي ذمّتـي ذمّـة مــا احـسّـبْ لــه
وانّ احكم الأرض من (صيدا) إلى (طابة)= واطهّـر القـدس مــن نــذلٍ قـضـب حبـلـه
والخـشـم سـيـفٍ يـلـوح الـغــيّ بنْـصـابـه= لا سـلّـه الـلـي طعـامـه مــا يـجــي هَـبـلـه
وثــغــرٍ ولا طــاولــه ثــغــرٍ ولا شــابـــه= يــا قَبـلـة الله يــا مــا احــلاه مـــن قَـبـلـة
مــدري مــن الخـمـر والا الخـمـر بلْعـابـه= والا مــن الكـوثـر المعـسـول يِِسـكـبْ لــه
مـن ذاق معسـولـه الخـمـري ودلّــى بــه= مـن سكرتـه مـا نلومـه لــو يـمـوت اَبـلـه
كـنْ حـدري الشفّـه اليـا عــضّ بــه نـابـه= شـفّــة صـغـيـرٍ بـمــاي الـتــوت منعـبـلـه
ولسـان إلـى مـن حكـى والجـابـه الجـابـه= يـرتّـب الـهـرج مـابــه مـــن يـرتّــب لـــه
صوتـه ولا صــوت (عُــودٍ) عـنـد لعّـابـة= لا دقّّــه الـلـي عـلـوم الـفــنّ تُـنـسـبْ لـــه
والـخـدّ مــا غـــطّ نـــوره لـــون جلـبـابـه= والله مـــا شـفــت انـــا بـعــده ولا قـبـلــه
ودّه بذبـحـة حـضـر نـجـدٍ مـــع اعـرابــه= واشــوى, بريقـعْـه عـيّـا لا يـوجّــبْ لـــه
والـكـفّ حـالـه وحــال سـهّـيـل متـشـابـه= مـدري نسابـة! أو انّ سهـيـل نـاسـبْ لــه
بـإيــده مـلــك مـــوت هــلاّبــه وحـيّـابــه= قـــوسٍ تـمــزّع معـالـيـق الـحـشـا نِـبـلــه
وفوق النهد شفت (أخو بـدوه) بمشعابـه= وحـدر النـهـد شـفـت انــا خيّـالـة السَبـلـة
نهـدٍ مـن الثـوب الاحـمـر يفـقـد اعصـابـه= يبغـى يتنفّـس شـوي والثـوب ناشـبْ لــه
يـا ليـت مـن خـذْه صبّـح بـه ومسّـى بــه= نـــاسٍ عـلــى خـــزّة الـعـشـاّق منـجَـبْـلـه
وخصـره مسافـة مابيـن اصـبـعْ وسبّـابـة= أحـيـان يخـطـون فـيــه ويـلـبـس الـدِبْـلـة
وردفٍ ليا اقبل تقل مقْفي والـى اقفـى بـه= تـقــول مقبـل,عـسـى الله لا يـسـبّـبْ لـــه
لا ســار واهـتـزّت الشـطـوه حــدر كـابـه= تشـبـه شـجـاعٍ سـمـع غالـيـه يـنـدبْ لــه
والسـاق كنّـه لـسـان الــداب لاومــى بــه= أو كــفّ (طِفـلـة) تـــردّ الـفــرْد وتْحـبْـلـه
واقـدام لـو فـوق قبـر المـيْـت تـاطـى بــه= شفته يصوّت قبل يِضحـي الضحـى لإبلـه
بـعـض الأوادم هـبـال الحـسـن مــا عـابـه= والـيـا انهبـلـت , اكـثـر العـربـان منهبْـلـة
زيــنٍ بزيـنـه نـمـوت ونــوب نحـيـى بــه= مــا بـإيـده الا الشـقـا ونْـحـبّ نتـعـبْ لـــه
غلـطـان عـمّـه يخـالـد يــوم وصّــى بـــه= ســوات هــذا جمـيـع الـنـاس تـقـربْ لـــه
يـا زيـن انـا وانـت سِلْـك عْقـال وعْصـابـة= تُـومٍ عسـى مـن عقَـب للـتـوم يِعْـقـبْ لــه
يـا زيــن كـانـك وحَــشْ ريــمٍ فـأنـا غـابـة= غـدَت ضلوعـي علـى شانـك زهَــر رِبـلـة
بيـنـي وبيـنـك مــاْ بـيـن الـكُــمّ واجـيـابـه= وعلـيّـه ابـعـدى مــدى مـمّـن ورا القِبـلـة
يـــا زيـــن قـلـبـي علـيـكـم يـــدّرج دابـــه= بيـن الحصاتيـن حـذف النـاس عرقـبْ لــه
مانـيـب مـــن قـــال :يـابــه آه يـــا يـابــه= وهـمّـه بقـلـبـه كـبــر راس الـقـلـم ذِبـلــة
يـا زيـن موْدعْـك قلـبـي وانـتـه ادرى بــه= يـا طلبتـه لـيـه بـيـن الـنـاس تطـلـبْ لــه؟
أمّـا اسعـف القلـب يــا زيــن وتَهـنّـى بــه=والا فـأنـا الخـبْـل يــوم اطــرد ورا خِبـلـة