يقول الازوري والقاف لآلآل=قصيده في رجال وفي رجال
قصيده قالها من هيض باله=هلاليه معانيها جزال
عسى تزخر بها بيض الليالي=وتذكرني بها سود الليال
ليا قالو تعيش أبدع واغني=وأصرفها كما صرف الريال
سوالف عارفه ومزوح فيها=كما مزح الجبرتي مع هلال
معاني من ضمير(ن) ما تكلف=ضمير(ن) حط ف الدنيا وشال
بعد في غربها والشرق سيّر=وسيّر في جنوب وفي شمال
فلا جاب العلوم ألا عوارف=ولا أركى للحمول ألا جمال
ولا شال الهموم ألا معنى =نهار ان الردي مرتاح بال
يغرك ف العرب مُلك الجديده=ولبس الثوب الأبيض والعقال
ولا منك بحت عن المراجل=ورى ان المرجله من زود مال
فلا زاد العرب لبس المشالح=ولا قلل بهم لبس البدال
ضعيف العزم يقصر عن فعوله=ولن هبت به الهبان مال
وتلقى من تقول انه غنيمه=وهو مطواع مع بنت الحلال
فلا له قالة(ن) يمشي علاها=رثوع(ن) في قصار وفي طوال
فنا ما قلت عطها بالشتايم=ولا تربط عشيرك بالحبال
ولكن لا تعاينها وتمسي=طلي بيدينها روح وتعال
وبعض الناس في ربعه رزيه=حصاة(ن) لا تُحط ولا تشال
ليا ربعه على اليمنى تنحّوا=نكس عنهم وخلاها شمال
هذاك الحرمله لا عود فيها=ولا مرعى ولا حتى ضلال
وبعض الناس يزعل من ضلاله=ولن رزته كما الجدر الهيال
فلا غاضب ولا راضي يسرك=ولا حاله من الحالين حال
ردي الأصل لامنك نصيته=يذل من الأجابه والسؤال
عظامه ترتعد من كوب شاهي=ولوّ تموت ما يذبح خيال
وعنده بيض الله سود الله=ما يزعل لو تمده بالشمال
وبعض الناس يضحك لك بسنه=وهو عقرب ذنبها ف الرمال
وبعض الناس لا خذ منك زله=نقز فيها كما نقز الغزال
يجيب ان جاك وان قفا يودي=حياته بين قيل وبين قال
وبعض الناس كيده في ربوعه=وعند الأجنبي مثل الرخال
يدور ما يكيد عيال عمه=ويحسبها توديه الكمال
يشيل اتراب يحثى فوق راسه=هذاك يجوز في وجهه تفال
فلا به شر من حزب الرفاقه=ولا به شر من كيد الرجال
ولا به شر من بير الشراكه=ولو تسقيك من ماها زلال
ولا به مر(ن) أقوى من عداوه=عداوه عم ف الدنيا وخال
فلا جايز بها حتى المجادل=ولا جايز بها حتى القتال
وبعض الناس يا مطيب فعوله=خصاله ما تجاريها خصال
ليا شيلته الوحده حملها=ولن شيلته الثنتين شال
أله قاله ليا منك بغيته=وله مرسى كما ترسي الجبال
ليا منه حمل معروف صانه=ولو ابطيت كان ولا يزال
الا يا الله يا رب(ن) دعيته=تراني طالبك يا ذالجلال
ألا يالله ترحم من فقدنا=كريم اعد له بيض الفعال
ابو خالد ليا مني ذكرته=هشم قلبي ودمع العين سال
عويض يا عويض ما نسينا=وذكرك من مجال أليا مجال
فلا به بعدكم قاف(ن) يغنى=ولا به بعدكم قاله تقال
ولا به بعدكم ذيب الشيابه=ولا به بعدكم ذيب العيال
ولكن الزمن هذي فعوله=وما نطلب وما نبغى محال
وصلى الله على سيد البريه=شفيع الناس في يوم الهوال
وتم القول مني في معاني=كلام الازوري في قاف لال