يقول من عدا على راس عالي= رجم طويل يدهله كل قرناس
في راس مرجوم عسير المنالي=تلعب به الأرياح مع كل نسناس
في مهمه قفر من الناس خالي = يشتاق له من حس فالقلب هوجاس
قعدت في راسه وحدي لحالي= براس الطويل ملابقه تقل حراس
متذكر في مرقبي ماغدالي=وصفقت بالكفين ياس على ياس
أخذت أعد أيامها والليالي = دنيا تقلب ماعرفنا لها قياس
كم فرقت مابين غالي وغالي=لوشفت منها الربخ ترجع للأفلاس
ياما هفابه من رجال مدالي= ماكنهم ركبوا على قب الأفراس
ولاقلطوهن للكمين الموالي= ولاصار فوق ظهورهن قطف الأنفاس
ولارددو صم الرمك للتوالي= كل يبي من زايد الفعل نوماس
من بينهم سمر القنا والسلالي= مثل البروق برايح ليله أدماس
يقطعك دنيا مالها أول وتالي= لو اضحكت للغبن تقرع بالأجراس
المستريح اللي من العقل خالي= ماهو بلاجات الهواجيس غطاس
ماهوب مثلي مشكلاته جلالي= ازريت سجلهن بحبر وقرطاس
حمل ثقييل وشايله باحتمالي= وأصبر على مر الليالي والأتعاس
يابجاد شب النار وأدن الدلالي= واحمس لنا يابجاد مايقعد الراس
ودقه بنجرياظريف العيالي=يجذب لنا بع على أكوار جلاس
وزله إليا منه رقد كل سالي=وخله يفوح وقنن الهيل بقياس
وصبه ومده ياكريم السبالي= يبعد همومي يوم أشمه بالأنفاس
فنجال يغدي ماتصور ببالي= ورابع تضرب به أخماس بأسداس
لاخاب ضني بالرفيق الموالي =مالي مشاريه على نايد الناس
لعل قصر مايجيله ظلالي= ينهد من عالي مبانيه للساس
لاصار ماهو مدهل للرجالي= وملجاً لمنهو يشكي الضيم والباس
بحسناك يامنشي حقوق الخيالي=ياخالق اجناس ويامفني أجناس
تجعل مقره دارس العهد بالي=صحصاح دو دارس مابه أوناس
البوم في تالي هدامه يلالي= جزاك ياقصر الخنا وكر الأدناس
متى تربع دارنا والمفالي=وتخضر فياض عقب ماهيب يباس
نشوف فيها الديدحات متوالي= مثل الرعاف بخصر مدقوق الألعاس
زينثر على البيدا سوات الزوالي=يشرق حماره شرقة الصبغ بالكاس
وتكبر دفوف معبسات الشمالي= يبني علهن الشحم مثل الأطعاس