[TABLE="width:70%;"][CELL="filter:;"]

سلام علاهم
والله مشتاقين لهذا القسم وقراءة قصايد الاخوان
هذي من قصايدي الغزلية

[/CELL][/TABLE]

يا يم أنا سافرت والفكر خالي = ورجعت مشبوبٍ على القلب نيران
جربت أنا في غربتي كل حالي = وشربت من شيٍ للأذواق فتان
شيٍ شمَع في مهجتي ما يبالي = وارسل على عقلي ثمانين شيطان
يا يم طيفه شاخصٍ في خيالي = يا يمّحِي طيفه على مر الأزمان
غادرت فوق البونج واشين فالي = ونزلت بأرض المملكة حيل تعبان
ياليتني ما جيت والله قضى لي = واختار لي من خيرته كل ما زان
وياليتني قضّيت عمرٍ بقى لي = خادر وغارق في هوى الشوق سكران
ونمد أنا واياه حبل الوصالي = وأشد حبل الود والزين ويّان
يا يم أنا عديت في راس عالي = عديت أنا في مرقب الذيب سرحان
وعلى شناخيب المنيف الطوالي = غنّيت من وجدي وجريت الالحان
وقبل الغروب وبعد وقت الزوالي = طوحت شوفي يمة الغرب شفقان
وسالت دموع العين مما طرى لي = واغضيت وافكاري من الحزن شتان
يا يم انا كني عن الناس جالي = غريب مدري داري والاوطان
يا يم لو ان الليالي ليالي = ما صار لي بالزود يا يم نقصان
يا يم ضاعت حيلتي واحتيالي = ولا عاد لي يا يم حجة وبرهان
يا يم ماني عن هوى الزين سالي = حتى يفرّق بين روحي والابدان
حلفت انا منسى حسين الدلالي = حلفت أنا منساه لو كان ما كان
منساه لو تملأ البحور الرمالي = وتغير الدنيا وتفتر الأكوان
حتى يصير سهيل نجمٍ شمالي = والجدي يظهر فوق صنعاء ونجران
ولاّ تطير مع الهبوب الجبالي = ويشدّ من فوق الجزيرة عمودان
يا يم يا وجدي ويا وجد حالي = وجدي على ما عيش بديار الأسبان
حتى يصير الزين دايم قبالي = واقطف زهور الورد من كل الألوان

[TABLE="width:70%;"][CELL="filter:;"]

وسلامتكم

[/CELL][/TABLE]

[TABLE="width:70%;"][CELL="filter:;"]

خلف بن مرزوق
القسم منور بوجودك
وحياك الله في أي وقت

[line]
مرزوق العتيبي
صح بدنك
ومشكور على المرور

[line]

ذيبان
صح بدنك
وابشر باللي يسرك

[line]

بن نعيس
صح بدنك ومشكور على المرور

[line]

قحص
يالله المستعان
صح بدنك

[line]

Mohmmedot
صح بدنك
ومشكور على المرور

[/CELL][/TABLE]