للشعـر عشاقـه وللشاعـر افـكـار=وللفكره المعنـى وزيـن التعابيـر
واليا بديت القاف مانيـب محتـار=كن المعاني قدم عينـي طوابيـر
أختار منها مثـل مـا ودي اختـار=وتمطر مثل غيث السحاب المزابيـر
الى تغزلت اهـدي ورود وازهـار=والى مدحت امدح رجـالٍ مناعيـر
والمدح ما هـو سـرّ لا والله جهـار=يستاهله شيخٍ كسـب كـل تقديـر
هذاك ابو خالد عسى عمره اعمـار=دون القبيله وقفتـه دايمـاً غيـر
لا قيل ابن جامع / سكت كل هذّار=ريف اليتامـى فالليـال المعاسيـر
زبن الدخيل ومكرم الضيف والجار=ويشهد على ما اقول صفـرٍ مباهيـر
في قصره اللي واضحٍ مـد الابصـار=متوسطٍ في نجد في منـزل الخيـر
هو ذخرنا لا صار فالوقت مـا صـار=( لاد المروّح ) ما شكوا منه تقصير
في مجلسه تلقاهـم صغـار وكبـار=وزودٍ على الروسان تلقى الخطاطير
ما يبخل بـجاهه ولا سـاق الاعـذار=وفي نظرته تلقى لحاجتـك تبشيـر
هو شيخنا اللي ياقف الماقف الحار=طبعٍ لجدانـه وهـو واصـل السيـر
يوم انها غارات ومواجـه اخطـار=ومواقعٍ يشبع بها الذيـب والطيـر
تلقى الجوامع من على قحص الامهار=خيّالهـم يفتّـك وان ثـارت يغيـر
واليوم في وقت الرخا صاروا اسوار=درعٍ لنـا نلجـا لهـم دون تفكيـر
هذي تعابيـري وللشاعـر افكـار=ولا لي وراها غير صـدق التعابيـر