الهيـــــــــــــلا *** منتدى قبيلة عتيبة - وأركب أنا وياه ددسن غماااااااره .........

الباااارحه من لجة القلب ما امسيت
والنوم عن عيني محـزّمّ قشـاره

من كثر همي والهواجيس مليـت
وداج الفكر مابيـن تـاره وتـاره

لا ياغصون المال ياليـت ياليـت
يدني علي عودك وانا اقطف ثماره

واقول للحـظ الـردي ول وليـت
لا رحم ابو حظ ٍ يطول انتظـاره

وابـدل الغتـره بقصـه تواليـت
وازحّف المرسدس في كل حـاره

ولا اصيف غير في يونت ستيـت
وباريس لاجيتـه ينـوّر مطـاره

والقا طرب قلبي عقب ما تعنيـت
وارشح اسمي في سجل التجـاره

والناس حولي تتبع المال والصيت
واللي معاه ريـال يكبـر وقـاره

حتى ولو يخطي يقولـون اقديـت
ومثلـك يقدينـا ونتبـع مسـاره

هذي الاماني كان لـي ماتمنيـت
والا الحقيقـه ذابحتنـي القشـاره

عزاااه يا وقت الشقا ويش سويت
لاقلت زان الحـظ ثـوّر غبـاره

مابين هم الدين والفقـر صديـت
واتبعت حربك لي ثمانيـن غـاره

وانا على حربك صملت وتعزويت
لو ان كسر الظهر مالـه جبـاره

لعيون من حبه بنا فالحشـا بيـت
وتل الفواد وشـب فالقلـب نـاره

الغالي اللي شتت القلـب تشتيـت
مابين صده والوصـل والزيـاره

من اولٍ لا شفـت زولـه تغليـت
واليوم اجي سوره واقبل جـداره

تبكي على الاطلال وتقول حنيـت
والدمع من عيني يزيـد انحـداره

لكن علي رفقـه وديـن وتثابيـت
ومادام في راسي جموح ونعـاره

اني لاجي له رغم انف الطواغيت
لوهـو بعيـد ونازحاتـن ديـاره

واقول للحـظ الـردي ول وليـت
لا رحم ابو صبر ٍ يطول انتظاره

وابدّل القصـه بغتـره وجاكيـت
واركب انا وياه ددسـن غمـاره

.................................................. .....

نقلتها لكم ولا أعرف من كاتبها

تحيــــــــــــــــــاتي العطره لكـــــــــــم