عبد اللطيف الغامدي ياربنا تسعد مساه=حيثه سنافي لاطلبته حاجة ٍ قال لك تم
لكن في تال الليالي لازهمته قال هـاه=واول ليا منّك زهمته فز لك ويقول سم

يامرحبا ترحيب يالسيف المحنّى في خباه=حيثك شجيع لا مضيت بسكةٍ يقفاك دم
من لايتابع حاجته عند العرب يوكل عشاه=ولا يصيب الادمي غير اللي الله له قسم

دام البقا ياصاحبي والعلـم ياصـل منتهـاه=ونقول ياوجه الرضاء سرج جوادك واحتزم
السيف من حده تذوق الموت من بعد الحياه=لكن درجها علـى هونـك وسلـم واستلـم

حنا مع الله نطلبه دايم ونسعى في رضاه=نجدّ في ساعه عمل ونتوب في حزة ندم
لكنّ وش سيفٍ يقدمه السنافي لاخوياه=وانته ياراع السيف سيفٍ غير سيفك منثلم

مايذبح الرجال يارجال غير اغلب هواه=هذي حقيقه بينه عند العرب قبل العجـم
السيف سيف ٍ فاللقاء مايفعل الا بخصماه=والمشكله فاللي حلم لكن ليتـه ماحلـم

ياحاضر العتبان مرزوق العتبي وشبلاه=مدري كلا بوك الورق والاشرب حبر القلم
اقول له وش زبدة الموضع ياقاضي القضاه=يقول ما فالمحكمه غيري ورفرف ياعلم

ياحضرة العتيبان هذا الادمي ما اكبر دهـاه=راع النياق العفر مايجهلـك يـاراع الغنـم
انته من اول صاحبي مالك عن اصحيبك غناه=واليوم غيّرك الزمن والكرت بيديـن الحكـم

ياصاحبي مرزق ليت القدر ما يرمي غطاه=ان كان ما يطلع ليا منه غلا فوح الدسم
ها ردها بينك وبين اقرب جدر والاحصاه=مادام في ظنك تبي تقعد قديـر ومحتـرم

اجلس على قدرك وزيد ابه الحطب وانفخ علاه=الله يخلي لك هذاك اللـي تنـادي لـه ياعـم
عبد اللطيف الغامدي يزمر وانا اعرف مستواه=مانيب مستغرب لاقام ايطيش ويعبـد الصنـم

كم واحدٍ قبلك تعرض ميسم الكـي وكـواه=اصبر عليه شوي ماتبرى العطوب من العدم
اعوذ بالله من كلامك حسب منطوقك هـذاه=جاوزت زلات اللسان وجبـت زلات القـدم

لاتحمي المكوى وتكوابه قبل وقـت الصـلاه=ان قمت من تحتك لغم وان نمت من فوقك لغم
ياصاحبي شكلك بعدت من الهدف واللي رماه=كلمه لها معنى ونكتبها علـى حسـب الفهـم

ياعظم كيدك من عطاك اكبر غلا تجحد غلاه=لكن على ماقيل يامرزوق مد ام الشحم
راح الهدف لانك تخطط صح من غير انتباه=لا مروا الحجاج في جبك تلقيت الحصم

لو كنت تغليني حقيقه مارفضت اللي نباه=لكن كل اللي بنيته معك في لحظه هـدم
الطيش يعمي صاحبه والله يزيده في عماه=روّح يجي لك يوم ترجع لي وتعلن للندم

شرفتي يالسيف بالطاروق يامال الغناه=الله يزيدك فضل ويقويك في شكر النعم
الطيش ماله صوت ياذيبان لوتسمع نداه=هذي مزوح تروح والمكسب مجاراة الشهم