يا راكـب حمـرا تـذب الطواريـق=لين إني أعرف جودهـا مـن رداهـا
تسرح مع السفرة على فكـة الريـق=وتمسي المضيح ما تدانـت اخطاهـا
وإللي عليهـا طيـب يابـس الريـق=بيتـوع بالطرقـة ليـا مـا نواهـا
رجـل ثقـة وملـقـب بالمواثـيـق=حـلال صعبـات تـزايـد مـداهـا
يعطي الخبر ويجيب عجل وترافيـق=وكـم ديـرة بإقـدام رجلـه وطاهـا
وما دون عمي من طوال الشواهيـق=من رقـة تزمـي والأخـرى وراهـا
في دار عدميـن الرجـال الصعافيـق=مطـران بالجـودة تشـيـد بنـاهـا
ربعي هل الجودات مـا هـم بقابيـق=ونبي السموحة مـن مكـارم لحاهـا
سموحة ترقـد بهـا العيـن وتفيـق=عيـن شقيـة والمنـاعـة منـاهـا
عسى إن بالي تطلقه عقـدة الضيـق=والنفس قرب اقرابهـا مـن رضاهـا
هذا ونرجـي الله حلـول وتوافيـق=ويرجـع الحالـة إلـى مستـواهـا
أطلب من الله قبـل مـوت وتفاريـق=تفرج لنـا الأيـام عـن مـا وراهـا
لو كان مع لا بـه إكـرام وتفافيـق=لطامـة العائـل وسـعـد قصـرا هـا
في جـال عتبـان قـروم ومطاليـق=وقصيرهـم بالعـز يعـرف مـزاهـا
وإن جاء الربيع وجاء بروق وتخافيق=ركبوا علـى خيـل تقـارع حذاهـا
رماحهـم دون العدايـل زواريــق=على النقاء ثوب الشجاعـة كساهـا
لو جيت أبادله دون الأثنين ما أطيـق=الـروح حـب ربوعهـا مـن نقاهـا
يـا الله يـا الخـلاق رب المخاليـق=لا تعجـل الدنيـا عليـنـا قسـاهـا