ياونة ونيتها تسع ونات= مع تسع مع تسعين مع عشر الوفي
مع كثرهن باقصى الحشا مستكنات= عداد خلق الله كثير الوصوفي
ونة طريح طاح والخيل عجلات= كسره حدا الساقين غادٍ سعوفي
على سيوف بالملاقي مهمات= سيفين أغلى ماغدا من سيوفي
وعلى محوص بالموارد قويات=اسقي بهن لو القبايل صفوفي
أحشم بحشمتهن ولو هن بعيدات=وانام لو ان الضواري تحوفي
خليتني ياعقاب مابه مراوات= عيالك صغارٍ والدهر به جنوفي
من عقبكم مانبكي الحي لو مات= ولاني على الدنيا كثير الحسوفي
وياطول ماجريت بالصدر ونات= على فراق معطرين السيوفي
وياعقاب عقبك شفت بالوقت ميلات= واوجست انا من ضيمٍ بقعا حفوفي
مرحوم يا نطاح وجه المغيرات= إن جن كراديس السبايا صفوفي
مرحوم يا مشبع سباعٍ مجيعات= وغز الله انه عقبكم زاد خوفي
الخيل تدري بك نهار المثارات= ياللي على كل الملا فيك نوفي
والخيل تقفي من فعولك معيفات= تاطا شخانيب الرضم ماتشوفي