قفن بنا شيـب الغـوارب مزاليـف=عن دار مجلـي الثمـان الرهافـي
قفوا عليهـن يلعبـون الغطاريـف=وانا اتعجـب كـن مابـي خلافـي
انـا خلافـي لاجـي بالسراجيـف=باسباب مجمـول تخلـف اخلافـي
ياما زما من دونهم مـن حجاريـف=بيداا صحاصيـح شعـاف ومهافـي
بيني وبينه يهرف الذيـب وايقيـف=ويزعج ثلاث اصوات عقب الهرافي
من البعد بذنـه سهـال الهفاهيـف=وحيفانة منها اصبح الذيـب حافـي
علمي بهم بالصيف واليوم بالصيف=هـذه شهرنـا العـام يالله اتكافـي
ماولعنـه ناقضـات الاطـاريـف=نجل العيون مقر مـزات الاشافـي
عديـت لـولاح تعلـى مياهـيـف=شوحات عسرات المراقـي طفافـي
مدهال طفقات الشروق المحاذيـف=ولهن بلطفـات المـذاري مرافـي
ودليت اشيل الصوت في عالي القيف=والقيـل يرجـس بالفـؤاد متلافـي
واهل دمع مـن نظيـري ذاوريـف=تاليه غثـرب واول الدمـع صافـي
وحولت من راس النبا العالي امعيف=ولاشفت في راس المهايف عوافـي
هذا كلامـي حيـن قفـن زواليـف=عن دار مجلـي الثمـان الرهافـي