إن كان عندك علوم اجداد لي قلها= الزين والشين عندي كلها عادي
هذى حياتي وعارفها من أولهـــــا= عرفت طعم العنا من يوم ميلادي
عوجة زماني ليا حاولت أعدلهــــا= يجي بدلها ليا التعديل ما فــــادي
وإن جيت أبدل حياتي كيف أبدلها= قد راحت أولوفها عشرات آحادي
فكرت بالعقل أطلعها و أنزلهــــــــا= ولين ما فيه غير الصبر ميعـــادي
لي سيرة لو أسجلها وأفصلهـــــــا= تملا دواوين من طعم العنـا زادي
ماهي على مسرح التمثيل أمثلهـــا= و لا هي بلعبة جرت في ملعب النادي
دنيا دنية نطاردها و نشتلهــــــــــــا= واللي غدت به ترى ما عنه نشادي
و أحيان نمشي شويه ونتحايلهـــــا= و هيه تربص بنا في كل مرصادي
و كم واحد مع طرفها و يتغفلهــــا= فرصة و لن روحت مافيه معوادي
يجي على غفلة الدنيا و يختلهـــــا= إيقال صيدة و هو رامي وصيادي
وكم من غشيم تحطه في حبايلها= و يصير فالحبل مربوط و منقـادي
أحد(ن) ورى لقمته يسعى وياكلها= وأحدعلى نار من قو اللهب جادي
وأحد(ن) تصل لقمته قدام ياصلها= تجيه قدام لا يقطع لها الـــــوادي
و أحد(ن) تعب خلفها عيا يحصلها= و ليا قربها لياها مبعدة غـــــادي
وأنا تغربلت فيها من غلايلهـــــــا= لكن مخفي الهموم اجموع وأفرادي
هذي همومي وبصبر و أتحملهــــا= من كثرها مالها محصي وعدادي
قصة طويلة و لا تحتاج أطولهـــا= دونت تاريخها هجري و ميــلادي