الهيـــــــــــــلا *** منتدى قبيلة عتيبة - الحق مايزعـل زحـول الرجاجيل؟؟؟؟؟؟؟؟؟؟؟

الحق مايزعـل زحـول الرجاجيـل
وكل على ما قيـل مـن دون حقـه
ومادام لي حق عن الحق مـا اميـل
مهما لقيت مـن التعـب والمشقـه
الرجل ودك حـزة الضيـق حلحيـل
وبعض الموافـق مـا تعامـل برقـه
ماني بمن يرضى على النفس تذليـل
من الذل ما ارضى لو بمثقـال بقـه
ولاني بمن يركض ورى القول والقيل
ولاني من اللـي لاخـذا العلـم بقـه
ولا التفت لحقوق غيري ولا اعيـل
والثوب نستـر خملتـه مـا نشقـه
والراس راس ولا يعود على الذيـل
و الذيب ينهش باللحم مـا استرقـه
والكدش ما تحسب ليا عـدت الخيـل
ولا يجبـر المسمـار كـود المدقـه
والشمس نور ونورها يجلـي الليـل
والنـار تبـدا بكـل مـا تستـدقـه
والجدي مرجع والعرب عشقها سهيل
والنوخـذه يفهـم بغـبـه ورقه
والكيـف هيـل ودلتيـن وفناجيـل
وبـن ونجـر لا نضـا البـن دقـه
من شب له من نور غيـره قناديـل
يستر علـى نفسـه قبـل لا iتعقـه
من صد من غيضه عساها تساهيـل
نقضـي ولا نتعـب ورى كـل iنقـه
يزعـل وترضيـه الليـال المقابيـل
وان كانهـا بالحـق حنـا نحـقـه
والا فانـا ماجـاه منـي بهـاذيـل
وكانه زعل مـن موقفـي يستحقـه
يشد حيله بالزعـل كـان بـه حيـل
وفي طوفته لاضـاق راسـه يطقـه
ما همني لو فصـل الهـرج تفصيـل
نجـم عـلا مـا كـل عيـن تحقـه
اشره على بعض الرجـال المشاكيـل
ما ميـزت مـا بيـن جلـه ودقـه
والا الخبـول اللـي تـرد الأقاويـل
الكـل منهـم منتـه وسـط رقــه
يـا جاهـل كثـرة عليـك الغرابيـل
من الشوايـب ضايـع الفكـر نقـه
اتعب على كسب الرجـال الحلاحيـل
والا الردي له عرض الأكتـاف لقه
وقت الرخا يعجبك بالحـط والشيل
من السطر يرقص علـى كـل دقـه
يذبح ويصلخ فـي كـلام وتضليـل
وينهار لا من اشهـب الوقـت رقـه
الرجل مـا يخـدع بزيـف وتمثيـل
ولا يخـاوى كـل مـن كـان عقـه
عليك باللـي يفهـم العـدل والميـل
اليا حصل عـن جـور الايـام وقـه
ينفعك لا صكـت عليـك المحابيـل
هذاك حطـه فـوق راسـك ورقه

الشاعر: سعود ردعان الهاجري