جعلك ذخر .. والحب فكرة وبرهان=وانته تراهن .. كيف تِزعل رفيقك !
يوم ان قلبي جاك ولهان ضميان=وده يبل الريق من عذب ريقك
طبع ٍ كتبه الله على كل إنسان=وانت المحبّة يا رفيقي تضيقك
ما اقسى من الحرمان يا كود حرمان=فكر الوصال اليوم يشعل حريقك
ياللي تعذبني علشان قيفان=إلك القصايد تنحني في طريقك
خابر قصيدي من هواجيس بطران=وإليا حداك الوقت .. خِلّك صديقك
ينثر مع الابيات لولو ومرجان=لكن لا يغرق في بحرك .. عميقك
طالبك لا تقسى على فرخ شيهان=مهما علا ما ياصلك في طويقك
وارجع على ما كنت يا طير حوران=عايش على حبي .. وحبي يليقك
بيّنت لك حبّي بفكرة وبرهان=والله يحفظك يالرفيق لرفيقك ...