أنا ودَّي أكشف هالغطا وأفضح المستور=ولو كان فالموضوع بعض الحساسيه
أبيَّن لكل الناس ما يخفي الديكور=عن الساحة اللي نصف أهَـلها شريطيه
مقالات مشبوهه .. إثارة .. شهادة زور=قصايد بلا معنى خيالات سطحيه
بعيدين كل البعد عن رغبة الجمهور=يحاكون واقعهم من أبراج عاجيه
مريضين بالشهرة مرض يذهل الدكتور=يعانون مع قصر النظر إزدواجيه
الى جا بعَضهم قال أنا الشاعر المشهور=أنا الشاعر اللي ما خلق شاعرٍ زيه
وهو ما تمعّن زين في بيته المكسور=قصيده عبارة عن " بويتات شعريه "
وانا انسان مانيب امتواضع ولا مغرور=أحب الطبيعة والحياة الطبيعيه
أنا ما أعشق الظلما ولا أحلم بزيف النور=ولا ودي أقرُب شجرة الدّاب والحيه
صحيح إن ما للشعر قيمه ولا له دور=إذا ما وقفنا للعَبَث والشليليه