اول كلامي طلبتي ذكر الله=ماني عن الرب الكريم غناوي
أغفر ذنوبي يا محل ذنوبي=ان كان في بدع كلامي غاوي
مانيب من يمدح بقوله لسانه=ولا ني على عشق البني هواوي
على طلال الصبح خيل مخيلة=تاصل سناويها الى المطاوي
وبروقها الهند ومصاقيل العجم=ورعودها البارود والعزاوي
وتمطر بعطشان المحبب والقنا=والها بروس الخيرين تعاوي
جانا سعود مسير بجنوده=معه الدويش ولمة البداوي
ومعه جموع سبيع واهل العارض=وصبيان يام وبيرق القصماوي
ثمانية الاف عداد جموعهم=بلوى وربي يدفع البلاوي
وحنا ثمانمائة عداد جموعنا=ماش اجنبي فينا ولا برقاوي
الاد روق اللي عريب جدهم=لاجا من الحكام رد براوي
ندّب علينا شيخنا ابن محمد=ثم انتهض مثل العقاب الناوي
عودٍ تعطف في ظهر جلومز=جلومزٍ مثل القضيب الهاوي
مترفعٍ عنها اللحم بعلوها=شعلاً شعاع شعلّةٍ شعلاوي
وصحنا عليهم ثم عاونا الله=لين انها صارت لنا مناوي
ياظفرهم لاقرب الله دارهم=وحنا عليهم مثل نجمٍ هاوي
لكن سربتهم اليا اوجهنا بهم=شراد ريم مع حماد داوي
لكن سربتنا الي اوجهوا بنا=زمولٍ مخزمة على الكراوي
وطلحه نحوا عنا ببريه يسارهم=وتعاقبوا دهم العروق هداوي
كن الجنايز في نحاوي طلحه=جدع الخشب فالوادي السناوي
وحنا تلاقينا بسربة علوى=وساع الطعون مطوعين الغاوي
ونخيت مزحم سعد منهم ربعه=يوم اللقا زادوا ورا الهقاوي
ردوا يمانيهم لكل مجرب=ياما خذوا من روح كل مساوي
نضرب بسلات الهنادى روسهم=ونقصم مثانيهم مهيب سطاوي
ونرخي فيهم حد كل موصلة=في فعلها يحتار كل مداوي
وارويت مذلوق القنا من خيلهم=والشيوخ ما صدوا لها نحاوي
ومنعت سلطان البعير بينهم=يوم ادبحوا شرابة القهاوي
يارب تنجي وتنجي سابقي=اللي تزبني عن الاهاوي
ما يلحق العنان هامة راسها=ياكود يركيها على السنداوي
مضرب يديها في صليب الرقه=تاخذ من ادنى الحزم كبر الشاوي
قبٍ من الزلبات وا فٍ عدها=بنت الاصيل وركضها فجحاوي
ابرها وام العيال تبرها=تشرب حليب الفاطر الجنفاوي
تطلعن يالبيض في مركاضنا=وصلت كسايرهم الى الحجناوي
وعزي لهم لولا اسمر في خيلهم=يهوي علينا اهواية النداوي
لا رحم ابو من صد عن محرافها=يوم انجلاع الستر عن مضاوي
نطعن لعين اللي تهل دموعها=تبكي وفي تالي البكا نخاوي
تقول ياالظفران من عاداتكم=هوشوا عسى يبقي لنا شلاوي
ونطعن لعين اللي تجر حنينها=عفرا تبا صيفية المطاوي
قلت ابشري بالفك ياحم الذرا=دام الطعن يفك والاهاوي
تزبنوا عنا قصور عنيزة=لين احتماهم بيرق القصماوي
ترعى بنا عوج الركاب وتنثني=ماحدرت حسلة الى الحجناوي
والمدح لله ثم نسل محصن=عسى لهم عند الاله عراوي
ذوي ثبيت اهل المناخ شيوخنا=واهل الكرم والمنزل المتساوي
سواقة المغتر على الحرابه=يوم الحريب عن الحريب يلاوي
يا مسوي الفنجال عده لمدوخ=واثنه لابن صلال والجلاوي
وانا زبون الحرد ابو ضيف الله=لا قصر البرطم عن الشفاوي
وانا احمد الله يوم انا من لابه=ماهم بقطمان اليدين شواوي