يكرم رسول الله عن اللي سخر به=يكرم شفيع الخلق عن كل سباب
الصادق المصدوق صدق الخبر به=ما هوب لإرهابي ولا هو بكذاب
كل الصفات النادرة تنذكر به=وصايفه ما تنجمع ما لها حساب
الطاهر المحبوب ما حدٍ ذكر به=فعل من الأفعال يترك وينعاب
الصدق باقواله ظهر واشتهر به=كل البشر تشهد ولا فيه مرتاب
المصطفى الهادي على خير دربه=نوّر طريق الناس في كل مرقاب
اشعل مصابيح الهدى وانتشر به=دين التسامح عن قناعات واعجاب
ما هو على ما قيل يشن حربه=ولا هو على ما قيل يَضْرِب بمشعاب
حلمه وعطفه بالرخا ينشهر به=وفي ساحة الميدان مقدام ما هاب
شلة يدين اللي برسمه سخر به=شلة يدين (الدنماركي) ولا طاب
الكافر اللي في مقاله غدر به=ما خاف من رب السما رب الارباب
تبت يدينه لو برسمه فخر به=وتبت يدين اللي معه صاروا اذناب
هذا النبي لا عاش منهو فجر به=هذا النبي سيد البشر وأزكى الانساب
عليه أصلي واتبعه وافتخر به=صاحب لواء الحمد حلال الانشاب
اللي يسبه سب عجمه وعربه=يسب مليارين مسلم ولا هاب
يا أمة الإسلام توقوا لقربه=خلو لكم في مركب المجد مركاب
عُفٌّوا عن أكل (الدنماركي) وشربه=خلوه لجل المصطفى يحسب حساب