اشكر جنابك يابو عبدالله الخيّر=وارجي من الله تكون بخير ومقوّا
جيت امس يمي على صالونك مسيّر=وانا فتحت الك باب الود من جوّا
لكن الي صاحبٍ مذموم وصغيّر=نسيت اعرّفك ابه واخبرك من هوّا
شيطان شعري ملعون الجد والصيّر=ليتك تشوفه بعد ما رحت وش سوّا
قام يتخطف شوارد فكري النيّر=الظاهر انه على اللي عندكم خوّا
كنت احسب انه ضعيف وباعه قصيّر=حيث ان اله عام لا سرح ولا ضوّا
واليوم وده يبدل في ويغيّر=يفتل وانا انقض وحبله عسر وملوّا
ماللغني حق في ما يكسب فقيّر=افزع معي نردعه عن فعل ما نوّا
والا ترى وضعي اصبح صعب ومحيّر=في وجه من جده اخرج ادم وحوّا
يالشاعر اللي تقود الركب وتعير=وكسبك غفال ٍ تقلد جوخ وتفوا
كم خايع ٍفيه صيد الفكر ما ذير=تعانقتبه زهور الشيح والحوا
نحلة هجوسك توقع فيه وتطير=وتجني رحيق ٍطري ٍما بعد ذوا
وتشيد بيت الشعر في مقدم الدير=ما هوب خدر ٍيغز ايام ويطوا
ومن وَرْد عد القصيد بحبل ٍقصير= صدّر وهو ماشرب ذوده ولا روا
ومع غير راعيه ما يركب ولو ظير=ولا يسلم من المرض لو راسه يكوا
وانته جمل يابن عمي مانته بحوير=ولكل فعل يعزالرجل تتبوا
من العام تكتب من الشيكات وتجير=وصدى توجدك باقصى المملكه دوا
وفكري ليا اطريت علم منير ومنيّر=نوبٍ يدل الطريق ونوبٍ يغوا