وكم علمته نظم القوافي = فلما قال قافية هجاني

يا بدر بن عياد بالطيب حيّيت = واهديت لك من غالي الورد باقة
وان كان ردّيت الهديّة وعيّيت = لاشك ابهديلك من الذود ناقة
يا بدر من خوّتك ملّيت ملّيت = وعزمت أنا يا بدر قطع العلاقة
قبل القصيد اكفيت واوفيت واوذيت = و حدّة لسانك مثل موس الحلاقة
واليوم تلعب لعبة القاف والبيت = تطرق بحور الشعر فنّ ولباقة
ليتك تركت الناس يا بدر واقفيت = وخلّيت ترديد العلوم الدقاقة
وكانك من اللي ياكل الحي والميت = عان السحيل الشعر قاده وساقه
مطلق وقومه بالكرم جاء لهم صيت = اركب على خيلك وجيشك ولاقه
وان كان مع دربه تعنّيت وازريت = ولا عاد لك بالشعر حيلة وطاقه
ازهم على ربعك يجونك شفاليت = يشاركونك بالظفر والحماقة
انخ الذي راسه يقصّه تواليت = وانخ الذي ثوبه ليا نصف ساقه
يا بدر انا للشعر ما قط ردّيت = توّي عليمي ما عرفت السواقه
واليا بغيت اللعب للميد طبّيت = العب ولو ما كان عندي لياقه
واسلم وراجع زلتك كان زلّيت = واحفظ حقوق الله وحق الصداقة