الهيـــــــــــــلا *** منتدى قبيلة عتيبة

ياللي دفنتوا جثتـه.. ليـه تبكـون؟
لولا الحيا..لأقـول : معكـم خذونـي

منه انحرمت وكنت انا عنه مسجـون
ما أذكر لمحته .. غير مـره بعيونـي

شفته ..وكانت فرحتـي مالهـا لـون
عجزت لأوصف .. من لمحته شجوني

ياليتني ..كنت الكفـن يـوم تمشـون
أبقـى معـه بالقبـر ثـم تدفنـونـي

أو ليتني .. من خلفكم كنت (مجنون)
أتبع خطاكم والعـذر هـو : جنونـي

أبكي وراكم .. وأدعي ان كان تدعون
مايكفي انه عـاش عمـره بدونـي؟؟

تكفون < هاكم عمري اليـوم تكفـون
برخص حياتـي دام خابـت ظنونـي

مافادني صبري !! ولا فادنـي عـون
ولا فادني دمع(ن) .. حرق لي جفوني

ياما بكيتـه والبكـي يحـرق عيـون
ميت أو انه حي .. دمعـي بعيونـي!!

العام كان بفرحتـه.. يعـزف لحـون
واليوم ؛ تحت الأرض .. ماهو بكوني

لكن أنا في فرحتـه.. كنـت مدفـون
فوق الثرى .. واليوم موته سجونـي

(سميت قلبي عقـب فرقـاه ملعـون)
هو و الليالي .. عن هنـاه امنعونـي

ياليتني.. ماعشـت لحظـه بهالكـون
وياليت ربعي .. في سكات اذبحونـي

وياليتكم .. عن همّي اليـوم تـدرون
منه انحرمت > ومن عزاه .. احرموني

حتى بوفاته !! يوم أنا طحت مطعـون
أخفيت طعناتي .. قبل لا يفضحونـي

بكيت!! لكن .. ماتظاهـرت بالهـون
أبكي وأقول : الموت هو سبة طعوني

وإن كان في حبّي أنـا ..ماتحسّـون
دلوني لقبـره .. وهنـاك ..اتركونـي
.
.