ماعاد لك ياجمس في خاطري كرت = من يوم ساقوك الغشم والوراعين
انااشهد اني مـنك عـزلـت دبـرت = ماعـاد اطالــع فيـك ابطـارف العين

الله واكـبر يـالـدلـيهي تـكـبــرت = خـلـيـتني شـفـقن بـركب السيادين
ماهو بحق اليوم عـني تـنـكرت = تلعبي الورعان وســـط الــبلاديــن

جار الزمن ياجمس فيك وتعثرت = ولانـسـيـتـك يــوم جـمع الـمـحـبـين
واليوم روح كنك اليوم مـاصرت = لاصار وقتك يجـمع الـزيـن والشين

اذكر زمـان فـات كـانـك تذكـرت = حكمك علي حكم الرجال السـلاطـيـن
اسرفت فيني يالدليهي واسرفت = اسرفت بي سرف اليـهـود بفلـسطين

فكرت في مافات ياجمس فكرت = عديت نفسي مــن حســاب الـخبالين
كم مرة ضيقت صدري وبنشرت = والناس ماتاقف على الـدرب ماشيـن

كم مرة فيـهـا زعـلـت وتكـدرت = وسريت بي فالـلـيل والناس مـمسين
في مطلبك يالخالدي ماتــعذرت = رفيق صافي لك على العسر واللـيــن

هيهات كم مره علينا تبـعثرت = وكم ورشة فيها مضالـك اسـبوعين
هذي طبوعـك كـلها ماتغـيرت = غربلتني وذهبتني ديـــــن في ديــــن

يعني خلاص تقول يالخالدي برت = يوم انزلوا بالــمدن كــل البــداوين
ياما وردت العـد وامـرار صـدرت = على الوعر تعشيق من ثالث اثنين
وسط الغماره مع وليفك تـخدرت = وبدر الغريب يجاوب الصوت صوتين

يالعنبوك اسكت تراني تفجرت = وكل العلوم الماضيه جبـتهــا منــيـن
خلاص انا قررت شاريك قررت = وكل السوالف خلها فيك بــعــديــــن
بذبــح بدل حلفي كرامه وكفرت = والناس لوتزعل انـاوانــت راضــين
تمشي بي الدنيا وانا ماتطورت = ابيع واشري جمس خلفه قزوزين