أنت يالكبتن مناحي بجنسيتين=كلها في عتيبه شاعت أذكارها
عشت جار لنا فالدار حول أسنتين=لين ربي ومرنا نكشف أسرارها

ابشر انا على تقوى ودنيا ودين=قبل لاناصل الحفله وشعارها
والدروب الثنين يسار ولاّ يمين=روح فايمينها لا تمسك إيسارها

الهويمل صحيبك بين جيمن وسين=فالقويعيه الله يسقي أديارها
هل كل الدعاوي والمخبا يبين=يارجالن منول نسمع أشوارها

فالقويعيه اصحابي ميه واربعين=يامراسل ديارك عطني اخبارها
السوالف تجي والطيب للطّيبين=والمعْرفه تجاره عند تجارها

أنت تمشي برخصه شلتها فاليدين=ماتغير ولو حاولت تغيارها
كنها رخصتن لذياب هاك السنين=ياصحيب اللكاعه عمها جارها

ياذياب القضيه كلها كلمتين=والعرب فالقضيه عمست أبصارها
حيلة الذيب ماهي حيلة ابا الحصين=ويمكن تصير بكره حيلةً غارها

القضيه بقاضي حق مع شاهدين=اصبر اصبر ونكشف خافي استارها
نعرف الذيب ماله فالدهر وجهتين=ياحرارن تحاول تجحد اوكارها

مالنا غير مكه قبلة المسلمين=ربنا اللي ومر ياذياب واختارها
وطاعة الله حق.. وطاعة الوالدين=- والعرب يالعتيبي ما جحدت دارها