غدر الصحيب وطمعة الشاه فالذّيب=صارت وهذا يـا فـوادي زمنهـا
الوقت لزم اهـل الوفـا بالتلابيـب=واهل العلـوم الهينـات احتظنهـا
ولاحق تحت قدر الرخوم المشاهيب=ونار الوفـا غيّـم عليهـا دخنهـا
وساوى مقـام الثايـره بالمكاذيـب=وصلّى على روح الحيـاه ودفنهـا
يالله ياسامـع دبـيـب الدبـاديـب=يامن سفينـة نـوح فالمـا وزنهـا
تعين من يمشي على منهج الطيـب=وتمكنـه مـن حاجـةٍ مامكنـهـا
هذي سنه وانا اتحـرى المناديـب=واخيل بارق شامهـا مـع يمنهـا
واجوز عن محبالة الشك والريـب=والمشكـلات احلهـا وامتحنـهـا
وان دندنت بين الضلوع الهناديـب=وضعفت هدايتهـا وقويـت فتنهـا
وتكدرت من زوبعتهـا المشاريـب=والخـوف خيـم فالمعاليـق منهـا
احترت.. والانسان مايعلـم الغيـب=وخفت اني اشريها ولااقدر ثمنهـا
ولجيت للمولى مجيـب المطاليـب=اللـي مقاسيـم البنـادم ظمنـهـا
ثم للعقول اللـي بنتهـا التجاريـب=اعقـول قـومٍ مالـهـا مافتنـهـا
والشور ماهـو لاجهالـه ولاعيـب=حكمة رجال ٍ ومن تعومـس زبنهـا
تحط لك فالجال الاملس مقاضيـب=ولحيـة ابليـس اتلّهـا وتحسنهـا
لاخذتها مـن مكمليـن المواجيـب=اللـي بديـن الله تـامـر وتنـهـا
والمعرفه، حظ ، ونصيب، ومواهيـب=ومجلس رجـالٍ جهلهـا ماسكنهـا
والعبد ذيـبٍ والخطايـا مراقيـب=ماله ليا سلـم الصواديـف عنهـا
والرجل بيتٍ والمراجـل مناسيـب=لاصانهـا وبطاعـة الله قرنـهـا
وللشيخ ضيـف .. وللهزالا معازيـب=ولايقنـي الخلفـه محـرّم لبنـهـا
وام الغصون المورقات الرواطيـب=لاظمـي واردهـا تهـاوت شبنهـا
وسيل المخايل سحّ واللا مساريـب=كم من شعوبٍ شالها مـن وطنهـا
وصلاة عبّـاد الريـا فالمحاريـب=تهفيه لاجـت جثّتـه فـي كفنهـا
واللي ربت بين الضلوع المحاديـب=غنيتها وش رايكـم فـي لحنهـا؟