يالله ياللي تعلم الشر والخير = اعفر ذنوبي ياعزيز الجلالي
يافاطري كنك تبين المحادير = ماجت لك الدنيا على شف بالي
رديتها مطعت بعض الاشاوير = انزل معا بنيوس يم الجبالي
والحيهن للسمر الاشهب بواتير = واصبر بجظلاهن على قد حالي
ماهو بغض ٍ للشفا والمصافير = لكن شحٍ فى النياق الغوالي
يالله في نواٍ مزونه مزابير = يسقي مرابينا صدوق الخيالي
من مجحفٍ سيله يغطى العثامير = لين اغتشاه النبت مثل الزوالي
ياماحلى طردٍ بها في المخاضير = قبل الضعون تنفج ام الغزالي
في وسط روضٍ والضعن به مصارير = عقب اللقاح مفردين الجمالي
صروّ وجروّ من عيال الاباكير = ولاعندهم فى البيت لوكان خالي
اخير من صفر العيون المثابير = اللي خطاها ماتجي اربع اقفالي
والحرب عنا ورا كبشان والنير = واللي ورا شريان جاهم جفالي
يانجد احبك مير جا فيك تكدير = عشرت يامجحود عقب الحيالي
ماتلقح الا بالجموع الصوابير = ولاتاكل الا كل عودٍ جلا لي
شبيت نارك جوف نزل الدواوير = المال يوخذ والجنايز تشالي
وذليت من عكف السيوف البواتير = لوكان ماسويت شي(ن) ببالي
عينت بلجان الوجيه المسافير = كملتهم يالله عساك الكمالي
اللي يعزلون اللقاح المواقير = على مقاريهن سواة العلا لي
في مامضى نفتكها فى المحاضير = ترعى بنا السرفه بعيد المفالي
تنقى قرايعها واهلهامخادير = من ذل اخو نوره منجي التوالي