المعذرة يالربع والله ما علمت ولا دريت = والاّ لأسوي لي قصيدة يالها من يالها
لكنّ وأنا جايكم سويت لي عشرين بيت =سويتها وأخترت من بين البيوت جزالها
أربع طعش نقــّحتها والباقية في قدر زيت!! = يكفيني الشعر الجزل مالي ومال طوالها
يا هاجسي ياللي من الهقوة وغادي لا هقيت = إفزع ترى ما للزوم رجال غير رجالها
حضـّر بيوتٍ تطرب السامع ليا منــّي بديت = قد اللزوم وقد هيبة عزوةٍ جينا لها
وأنا بيوت الشعر تخضع لي ليا مني نويت = والله لتخضع لي غصب والاّ لأشيــّن فالها
يالعزوة اللي يوم جاء مرسولهم في الحال جيت = لو ان حفلتكم على سطح القمر رحنا لها
ومناسبتكم غالية ذايع لها في الكون صيت = يا جعل فرحتكم على طول السنة وليالها
والحمد لله يا ولد عتقان يوم انك نجيت = وسيارتك فدوة وسيارة تجيك بدالها
ما يمنع المكتوب كلة لو والا ليت ليت = ما مع بنادم في المقدر حيلةٍ يحتالها
ما تحصر أمجادك يا بن عتقان لو اني حكيت = وانته مسيـّس من رجالٍ ما ضيات أفعالها
من سابق الأيام يا نعم الصحيب ليا نخيت=وليا نخاني قلت له حنّالها حنّالها
وبعض العرب يُـفقـَد وتبكيه الخليقة بيت بيت = همــّه يفتّ كبود خلق الله ويهدم حالها
وبعض العرب يمكن تشوفه حيّ وهوه حيّ ميت = وإن مات ما يبكي عليه إلا المره وعيالها