ياشاعر الروقه تعال اقرب وانا عندي كلام = لاتندفع ياصاحبي تلقى علومٍ ماتسر
احسب حسابك صح واحذر كل رجلٍ له مقام = والناس كلٍ له عيوب وكل واحد يستتر

ياالثعلي الاول هلا تقدير مني واحترام=قررت والتقرير نصه ماش حذفِ بالحجر
وانته مقامك معتلي وشدادكم فوق السنام= لكن ورعان العرب قامت تدربي فالكفر

بعض السوالف كنها مثل الذي وسط الظلام =ايقدم الخطوه ولايدري وش اللي منتظر
ماقول فيك قصور وانته لي ذخر وايضا حزام =وانا ماقول الا كلام الحق لو ادهى وامر

صادق ولا تكذب ومثلك لو تكلم مايلام= طيب وفيك الخير والليله مع خيرك حضر
ابشر بعزك كلما ضاقت وما اشتد الزحام=والله لاخلي نارها في دقن خصمك تستعر

اشره على الطيب واعذره بالاصول وبالنظام = وانته تعرف الخافيه ياليتك اتمد النظر
من يتبع المقفين يلقى اللوم وانواع الشتام =اسمع كلامي وافهمه والا ارم نفسك فالبحر

شرهتك عندي غاليه لانك كريم ومن كرام=والعلم مزحه عابره لن كان ماعندك خبر
فاهم وعارف يادمي واقرا على الدنيا السلام=عشرة وانا واحد نفر لكن عشرة عن صفر

في ذمتك لو جار وقته ثم تغشّاه العسام = وش موقفك ياصاحبي لودق ناقوس الخطر
اشوف كلٍ ماسكٍ ركنه وكنه في دوام = من لاقدر فالعاليه يمرح تحت ظل الشجر

لن دق ناقوس الخطرجيتك وفي كفي حسام=اذودبه ياصاحبي من دون بعضات البشر
من لايطول العاليه قل له يابن ثعلي ينام=حنا نسده فاللزوم ان صار به كر(ن) وفر

الحمدلله يارفيقي واللحم فوق العظام = وانته من اسبابك كثير الناس ضغطه منفجر
دوّر على راع السمينه واترك اصحاب الهلام=والرجل تذكر فعلته حتى ولو هو بالقبر