ياسلام الله على الهيلا رياجيل الشجاعه=فعلهم معروف من وقت الجدود الاولينا
من يبا ياخذ معي طاروق مدة ربع ساعه=يحتم(ى) الميقاف ويسد اللزوم ولايلينا

البقا يامعدي المرقاب لك سمع(ن) وطاعه=كان جنبت اليسار وتمسك الدرب اليمينا
احذر البابور في موج البحر يغرق شراعه=وانت رجال(ن) نعدك واحد(ن) منا وفينا

كل رجال مكاتيبه تجي سبة يراعه= كان حبر القوم يغنينا عن اسيوف ٍسنينا
دام أنا وياك سدٍ يحتمي فيه الجواعه= اعتبرنا ما سلينا واعتبرنا ما جفينا

مايكفينا من الطيب مكاتيب وطباعه=الحقيقه يعلم الله ودي الخافي يبينا
والرفيق ذراعي الايمن سند يسند ذراعه=لو يزين الوقت والا لو ينحاس ويشينا

كان ما كفاك هذا فابشر بحسن استماعه= لين تصبح تالي الدعوى سمن فوق السمينا
الرفيق انشبهه كنه أخوك من الرضاعه= لو يطول الوقت ما ينسى جميل الطيبينا