لا واهني اللي من الدين سالم =واسعد عينه مهتنن في منامه
مادقّه الهاجوس صاحي ونايم=ولا زاره الدّيان راع العمامه
أنشهد إن الدين سمّ السمايم= سمٍ ذحاحٍ ما ذكر به سلامه
بحرٍ عميقٍ فيه غاطس وعايم= واللي بوسطه غاص يصعب مقامه
يقوله اللي ذاق مِرّه ونادم=تسعين مَرّه طبّ سوقه وسامه
طبّه وداجه عقب ما كان شايم=حدّه زمانه غصب يلبس حزامه
مشعان يا مشكاي وين انت هايم=خليتني لعداي فوق المسامه
إن كان عندك يالعتيبي عزايم=وتقول للميقاف عندك شهامه
شدّ الحزام وخل عنك الولايم= إفزع لأخوك اليوم وأطلق لجامه
وإن ما فزعت أخترت عنك العجايم=ولا نعدك لابسن لك لثامه
للرجل ميقافه ويحماه دايم=والعُود تِعرف نبتته وإنصرامه
واليا حصلي منك تاج العمايم=تستاهل البيضا وتعطا وسامه
يحماك رب البيت لفح السمايم=يكفيك شر الناس وأيضا حرامه
يا شوق من لبس الذهب والزمايم=أبو جديلٍ فوق خدّه علامه
أبو عيون سود تحت اللثايم=والزين كله فيه ظبي العدامه
وصلاة ربي عدّ ماشي وحايم=واعداد ما تمطر مزون الغمامه
على نبيٍ صار للدين خاتم=آخر رسولٍ عزّز الله مقامه